CEPESMA

admin (11 de septiembre, 2011)

La CEPESMA espardió’l so mensax de cuidar y protexer el mediu marinu, dende hai más de 15 años.CEPESMA, Coordinadora para el Estudio y Protección de Especies Marinas, ya un referente nel conceyu de Valdés, n’Asturias ya nel mundu, sobre lo que representa’l cuidáu de los seres vivos nel nuesu Planeta.
Los valdesanos sentímonos mui arguyosos de tener en L.luarca’l Centru del Calamar Gigante, nesta vil.la na que la mar forma parte de la idiosincrasia de los l.luarqueses. La mar ta presente na so forma d’entender el mundu. Sicasí, a la mar tol conceyu nos sentimos venceyaos. Muito por esta concienciación que la CEPESMA espardió a lo l.largo d’estos 15 años. Anque ya unos años antes, Luis Laria, el sou presidente, realizó un perimportante l.labor de concienciación ya espardimientu, al rodiu de las especies marinas. Luis Laria protagonizó de forma altruista, muitísimas xeras, charlas ya esposiciones na estaya educativa, en colexos, institutos ya outras instituciones, l.logrando asina, espertar nos nenos, ya nel públicu en xeneral, un enfoutu alredor d’esti gran Proyeutu. CEPESMA tien dalgo especial que nos invita a querer la Naturaleza, porque’l mensax d’esta Asociación, ya amar a ya protexer a los animales ya al mediu. Importante Proyeutu que l.logróu sensibilizar ya venceyar cola vida nel mar a muita xente . Creáronse asina l.lazos afeutivos ya emotivos al rodiu d’esta causa pola proteición de las especies marinas.
CEPESMA foi enanchándose nestos años, ya nesti momentu, tien nel Centro del Calamar Gigante en L.luarca, la valiosísima coleición de calamares xigantes, única nel mundu, que tenemos el privilexu de tenela bien cerca tolos asturianos. Amás, cuenta col Parque de la Vida, en La Mata, tamién bien cerca de L.luarca. Nesti centru dáse-ys abel.lugu hasta la sua recuperación a outras especies, inclusive dalgunos animales exóticos. L’Actividá medioambiental del CEPESMA sigue medrando, siempre teniendo en cuenta la educación de los más pequenos na querencia de los animales y nel respetu del ecosistema marinu y las suas especies. Ellos serán nel futuru los que tendrán que cuidalu.
Toos sabemos lo castigao que ta’l nuesu Planeta, ya que las aguas de los océanos tán contaminadas. Esto ya un peligru pa las especies qu’al.lí viven, ya tamién un riesgu pa toos nós. Muitas especies tán en peligru d’estinción, pola intervención del home, como depredador de lo natural.
El nome de L.luarca, Valdés ya Asturias, sona nel mundu enteru, por una causa tan guapa como ya’l cuidáu, estudiu, proteición ya ayuda a las especies marinas ya terrestres
Ya importante dicir, que CEPESMA tien socios por tol mundu, y de xuru que siguirán sumándose muitos más. Son muitos los investigadores que s’interesaron nesti gran proyeutu ya que tán poniendo los sous saberes al serviciu de’esta causa. Muitos voluntarios trabayando, ya muitas instituciones ya Universidaes españolas, ya d’outros países, que col.laboran cola Coordinadora dende la sua fundación.
Préstame felicitar dende estes l.linias que me brinda La Nueva España, a l’Asociación Amigos de L.luarca, por proponer a CEPESMA al premiu “Pueblo Ejemplar de Asturias 2011”. Propuesta que sofito dafeitu ya qu’espero que’l xuráu estime’l valir d’esti gran proyeutu ya tenga en cuenta la sua impor

Categoría: General Comentarios Comentarios (0)

Lo verde triunfa

admin (6 de septiembre, 2011)

Los urbanites igual tenemos que volver al güertucu.
Yá nun sabemos qué comer. Col rollu del adelgazamientu, nun sé si por estética, si por salú o poles dos coses, prestámonos a les soluciones máxiques que nos ufierten dende la publicidá más tentadora. Yá nun sabemos qué comer y entregámonos a cualquier dieta ensin saber, a veces, les consecuencies. El Dr. Dukan fíxose millonariu cola dieta que siguieron tantes y tantes persones, qu’endelgazaron munchos kilos en mui pocu tiempo. Una dieta a base de proteínes que munchos espertos califiquen de peligrosa. Nun hai de quien fiase. Caún opina lo que-y da pola gana. Nun sé si con fundamentu científicu, pero hai que tar sollerte. Too son engañifes. Pa cuatro díes que vivimos val muncho más da-y gustu al cuerpu y dexase de privaciones. A la escontra d’esta dieta proteínica, lleguen con puxu los platos verdes. El verde ta triunfando na alta cocina. Lleo un artículu nun periódicu, que me llamó l’atención, sobre cómo la emerxente cocina nórdica apuesta pola sostenibilidá, cola presencia de lo verde en tolos platos. Agora que se zarró’l Bulli, ponse de moda otru restaurante en Copenhague, el Noma, que baxo’l títulu «Plantando ideas», entamaron una gran feria na capital nórdica, onde lo verde, el productu ecolóxicu: verdures, frutes y otros yerbatos, allegraron la vista y el paladar de los asistentes, ente los que se cuntaben científicos, cocineros, agricultores y, por supuestu, consumidores.

Nun ye que seya nada nuevu, siempre se comió dalgo de verde (non muncho) y hai muncha xente vexetariano. Lo verde tamién reinó nel Bulli, dando color a los platos. Como yeren tan grandes y de diseñu, había qu’enllenalos de cagaratos de colores. Cola vista tamién comemos. Pero nun sé si con eso nos conformaremos. El casu ye qu’esti restaurante, el Noma, que ya lo anuncien como’l númberu ún a nivel mundial, en pocu tiempu va ponenos a toos a pacer. Somos asina. Güei les noticies cuerren como la pólvora, y tolo rellacionao cola cocina inflúyenos. Aquí n’Asturies onde la yerba medra que da gustu y ta xugosa, pronto vamos amansiar praos y montes p’alimentanos, como si fuéramos auténticos herbívoros. Y teniendo en cuenta lo que medren tamién dalgunos animales que son herbívoros, fairémonos unos grandes mocetones, ameyorando asina la raza. Lo meyor de too esto ye que, siendo desaxeraos como somos nós, aforraremos un montón en comida. Acabáronse los chuletones d’a kilo, pexes enteros nel platu, pates de corderu y toes eses carnivoraes que comemos a fartar.

Sicasí, con esto de la crisis, seique ta bien que lo verde triunfe na cocina. Los urbanites igual tenemos que volver al güertucu, anque seya na terraza, dalgo que per otru llau ta poniéndose de moda. Y dexase de los güertos que se trabayen en facebook, que son una chorrada virtual.

Categoría: General Comentarios Comentarios (0)

“Ratón”, toru matón

admin (20 de agosto, 2011)

El xen del vampirismu, el placer de ver sangre pel suelu.Ver sangre corriendo pel suelu y muerte en direutu, alimenta’l morbu de la xente. Nun toi mui segura si esisten o nun esisten los vampiros. Refiérome a los que chupan el sangre, porque los que chupen enerxía, trabayu, y otres coses y s’apoderen del maxín de los demás, hailos, y abondos. A estos yo más bien los nomaría chupócteros, o chupones que viven de «chupar». D’otramiente, igual se podíen nomar vampiros a los que sienten placer con ver sangre pel suelu, como si s’alimentaren cola vista y disfrutaren del so color roxo intenso y del golor a sangre fresco.

Toi convencida de que la mayoría debemos llevar dientro’l xen del vampirismu. Y dígolo porque tolo que seya ver sangre derramáu, tien tantu morbu, que ye capaz de distraenos l’atención d’otres situaciones muncho más importantes poles que nos tendríemos qu’esmolecer. Pero estes noticies que saquen sangre y muerte en direutu, contribuyen a tapecer la realidá social que tamos viviendo, y como si fuera una bola de nieve, van medrando mientres rueden pelos telediarios y periódicos.

Nun dexa de ser tráxicu’l fechu de qu’un toru mate a tres persones, y cornie a más de cuarenta. Pero ye muncho más grave, que, «Ratón», el toru matón, se convierta nun animal estrella, que lleva camín de ser estrella de munches fiestes del nuesu tochu país. Tamos tan llocos que, a esti toru matón, van llevalu per pueblos y ciudaes pa que los más atrevíos disfruten d’emociones fuertes. Llevaránlu de xira per munchos llugares d’España, de xuru con un caché altu, como si fuera un artista de primera. Quiciabes axustáu en función del númberu de muertos y firíos que rueden peles places. Tamos tan llocos, que somos quien a convertir la muerte nun espectáculu. El sensacionalismu col que se presenten estos socesos, amosando escenes fuertes nes que la muerte tien presencia en primer planu, va contaxando a los telespectadores y hasta a los organizadores de festeyos.

A mi nun me gusta l’espectáculu de los toros. Quiciabes me llibré del xen vampiru, porque nun me gusta nada ver sangre pel suelu. Debe ser por eso polo que me llama l’atención el que por muncha tradición taurina que tenga un pueblu, lleven un toru peligrosu, como ye’l yá perfamosu «Ratón», sabiendo que lo más probable ye que caigan unos cuantos participantes machacaos pola so hábil cornamenta.

Cada pueblu será llibre de mantener les sos tradiciones, agora nun voi a entrar nesti tema tan complicáu, pero, en plenu sieglu XXI, polo menos habría qu’esixir seguridá dafechu y non soltar estos animales engafentaos, que se sabe por anticipáu que llevarán la muerte a les places.

Nesti sen, yo toi mui contenta porque’l conceyu Castrillón fuera declaráu, hai unos años, conceyu antitaurín. Abondo se sufre por otres coses ensin traer el sufrimientu a les fiestes.

Categoría: General Comentarios Comentarios (0)

Xube la marea

admin (6 de agosto, 2011)

L’augua pue llegar a inundar los requeixos más llonxanos.
Yo, que soi de tierra adientro, enxamás penséi que la marea podía ser tan grandona, y xubir tanto, que podría llegar a inundar los montes. Pero yá se sabe que’l mar ye abondo caprichosu y cuando embravez de verdá, ye incontrolable. Les foles puen chapicar a muncha distancia, ensin que seya necesario tar a la vera l’augua.

Mio güela siempre nos dicía que la mar yera mui falsa, y que tolos díes del añu tragaba a una persona polo menos, en dalgún llugar del mundu. Siempre nos ponía cuidáu pa que cuando díbemos a la Villa de L.luarca y nos llegábamos a ver el mar, o, yá de mozucos, a disfrutar de la playa, tuviéremos sollertes ante’l mar «traidor» como nos dicía ella.

Esto son coses de la xente que nun lo conocemos bien, porque los «pesquitos» de L.luarca como los d’otres villes marineeas, nun-y tienen a la mar nin plizca respetu. Ta visto que lo que se-y depriende a una de pequeña, queda grabáu pa siempre na memoria, y ya mui difícil desfacese d’ello, sobre too de los mieos. Deprendí a nadar con un profe lluarqués, que s’enfotó muncho conmigo, pero lo que nun consiguió foi que-y perdiera dafechu’l mieu al mar y a les foles. Sicasí, lo que güei daveras me sorpriende y me fai sentime impotente son otres marees producíes, non precisamente pola atraición de la lluna, sinón pola atraición de les perres. Marees que tán chapicando y llevando per delantre a abonda xente, enllamuergando terrén virxe qu’enxamás se pensuó que podríen intentar inúndalu.

Nesta nuesa sociedá de marees vives qu’en vez de chegar en septiembre lleven meses inundándolo too, ye pa vivir sollerte y tener abondo mieu de tala gafez. Güei, más que nunca hai que cuidar muncho que la marea nun nos bañe coles agües revueltes por estafadores descaraos que chegaron a los requexos más escondíos. Falo del «casu Marea», del que siguen apaeciendo factures y más factures falses, semaes por tola nuesa xeografía. Esta «marea» sí que ye peligrosa. Si mio güela llevantara la cabeza y viera que la marea chega hasta’l monte, quien la vería apartanos d’estes «agües-velenu».

Categoría: General Comentarios Comentarios (0)

Llibru electrónicu

admin (6 de agosto, 2011)

La revolución de los formatos pa lleer, ventayes y torgues

Nun sabemos cuál va ser el formatu que triunfe nel futuru, pero, de xuru, que los llibros en papel seguirán adornando los estantes de les cases.

El llibru electrónicu (e-book) que yá ta nes tiendes dende hai unos años, ye tema de conversación ente escritores, editores, llibreros y llectores. A los más románticos préstanos más el llibru en formatu papel, seique pola satisfaición de manosiar les sos páxines, de pasar les fueyes p’atrás y p’alantre y de conservar físicamente los llibros que más nos gusten nos estantes de casa pa poder disfrutalos una y otra vez. Ver cómo avieyen con nós y cómo les sos páxines van poniéndose marielles col pasar del tiempu.

D’otra miente toos tenemos llibros a los que-yos tenemos un aquel especial y que por nada nos desfairíemos d’ellos. Llibros que son testigos de distintos momentos vivíos y que cada vez que volvemos abrir les sos páxines, revivimos, emocionalmente, distintes situaciones del camín que vamos recorriendo. Pienso qu’esta rellación emocional va a ser difícil, colos títulos guardaos, virtualmente, nun e-book. Pero nun m’atrevo tampoco a afirmalo. Sicasí, nos caberos meses la venta del llibru electrónicu aumentó enforma. Muncho porque s’aforra n’ espaciu y en pesu. Nun podemos escaecer que les pallabres ocupen llugar, tanto nel nuesu maxín como nos estantes. Sabiendo que cada vez tenemos menos espaciu nes cases, los pisos son más pequeños y nun queda sitiu pa nada, nun sería d’estrañar que munchos optaren por tener nel so poder esti artiluxu que nos permite almacenar una riestra d’obres nes sos páxines dixitales.

Inda nun tenemos los títulos que quixéremos pa poder descargalos y guardalos nel e-book, pero nun futuru próximu, de xuru que les editoriales editarán nos dos formatos, y que podremos disfrutar de la llectura en papel o dixital, caún como más-y preste. En dalgunes biblioteques d’Asturies yá podemos llevar prestáu un llibru electrónicu con una pila títulos ellí guardaos. Nada se pue predicir, porque nun pienso que vayan acabase les publicaciones en papel, pero tampoco podemos escaecer que les xeneraciones más moces conocen y usen a la perfeición los formatos dixitales, amás de la comodidá que supón llevar una biblioteca nel bolsu.

Ta perclaro que tamos ante una revolución de formatos, ente los que caún podrá escoyer pa saboriar un llibru. Yo soi de les que yá tengo un e-book. Enxamás dexé entrar en casa a papá Noel y la pasada Navidá dexómelu na puerta. Seique queriendo amigase conmigo. O cola cuenta de nun veme andar cargada de llibros, d’un llau pa otru. Nél e-book lléese perfeutamente y ensin cansar la vista como nel ordenador. Pero nun me presta lo mesmo tener un títulu guardáu nel llibru electrónicu que mercar un llibru y llevalu pa casa. De momentu ye otra cosa. Anque a veces el llibru quede por munchu tiempu dormiendo nos estantes.

Categoría: General Comentarios Comentarios (0)

Branu caliente

admin (24 de junio, 2011)

Paez que se nos avecina un branu «caliente» y con munches tormentesMientres escribo esti artículu ta entrando’l branu. Un fenómenu invisible, pero que somos quien a sentir los sos efeutos. El Sol cai a plomu, calienta enforma y enllénanos d’enerxía. Sin embargu, pa que nun nos escaezamos de que tamos n’Asturies, güei el día despídese con un poco d’orbayu y de muga.

Nun vamos, de momentu, temer l’agua. Los espertos anuncien un branu calorosu, yo añadiría que se nos avecina un branu «caliente», con munches tormentes, non sólo de rayos y centelles, sinón tormentes de tou tipu. Esperemos que nun faigan munchos estragos nos nuesos «semaos». Si con tanta crisis la collecha s’estroza nun sé qué va ser de nós.

D’otra miente, el branu ye la estación qu’alimenta l’amor y espierta’l ferver sexual. Ye sabío que cola calor too miedra. Que miedre too, bona falta nos fai, a ver si d’una vez encomenzamos a salir d’esti tiempu de murnia y de nublina. Y esti añu al branu tamién se-y amiesta la calentura política, qu’estos díes ye pastu de los medios de comunicación. Esta temporada, podríemos dicir que los periódicos ficieron l’Habana a costa de los políticos, de la política, de los partíos, de los pautos y d’otres noticies que nesta época de tensiones, cambios y aterrizaxes, van enllenando de sensacionalismu los medios. El refugayu políticu da munchu xuegu a los «paparachis» de la política, qu’anden a la gueta de cualquier socesu, que por más que nun tenga demasiada importancia, ellos han convertilu nuna noticia sensacionalista que sorprienda a los llectores. Eso sí, arrimando l’ascua a la so sardina. El poder de los medios ye bien conocíu. Y esta época ye afayadiza hasta pa desenterrar noticies que se pueden volver aprovechar porque son rentables pa desprestixar a los oponentes y sacar los trapos puercos de debaxo les cames.

Menos mal que cuando lleáis estes llínies taremos preparándonos pa celebrar a lo grande la nueche San Xuan, cuando salen les xanes a calmar los ánimos de los desesperaos. Hai qu’andar con tientu porque les xanes, melosones elles, tamién tienen el so puntu de maldá y puen comportase como auténtiques bruxes. Y ta llaráu d’elles. Hailes per uquier. Neso ganámos-yos a los homes por goliada. Nestos tiempos que cuerren quemaránnos el sangre, pero nun puen quemanos na foguera. En dalgo s’hai que divertir. Esta ye la nueche les trasnaes. Ye la nueche ideal pa deprender les artes de la bruxería.

Bromes a parte, procuraremos quemar lo malo del añu na foguera y pidir bonos deseos. Garrarémos unes fueyes de xabugu pa colgales nes puertes de les cases y escorrer la maldá. Revolcarémonos ente la rosada pa tener bona salú. Cuando hai crisis enfotámonos más nestes ancestrales creencies. Con dalgo s’hai que consolar. Ente revolcones y folixa escaécense les penes. De toles maneres bona falta nos fairá que San Xuan y la Madalena nos acompañen.

Categoría: General Comentarios Comentarios (1)

Pautu

admin (24 de junio, 2011)

10-6-2011
Fuercia o ayuda imaxinaria cola que se llogra que les coses salgan como se quier.Pautu. Según el diccionariu d’ALLA. Aición y efeutu de pautar. Ponese d’acuerdu en daqué. Fuercia o ayuda imaxinaria cola que se llogra que les coses salgan como se quier.

Y voi referime, lo primero, a esta última aceición. N’Asturies «tener pautu» dizse daquelles persones que consiguen lo que quieren de manera fácil y casi siempre inesplicable, y que también puen influir nos demás pa consiguir d’ellos lo que-yos peta. Na nuesa cultura tamos na creencia de qu’hai persones que tienen pautu, ye dicir, pautu col diañu. Esos son los que tresmiten males influencies y males enerxíes y nun dexen olecer al próximu.

Estos díes la palabra pautu (o pactu) ta nos titulares y nes páxines centrales de tolos periódicos. Nun sabemos si tará o non el demoniu pel mediu, pero hai que tener munchu cuidáu porque demonios hai munchos per ahí sueltos y llueu, una vez que pactes col diablu, ye perdifícil escapase de les sos manes.

Y viénseme a la memoria la obra de teatru «Faustu» de Goethe, cola que s’estrenó’l Centru Cultural Valey de Piedrasblancas, con una inmeyorable puesta n’escena pol grupu «Higiénico Papel». Una obra maestra que da muncho pa falar y da muncho más pa pensar. Faustu pauta col diañu y viénde-y la so alma. Dende aquel momentu enxamás recupera la calma. Eso sí, lliberóse de tolos prexuicios sociales, vivió tolos placeres mundanos y disfrutó de tolos vicios, siempre col diañu a la vera, martiellándo-y la cabeza. Pero, como diz el refrán, «quien mal anda, mal acaba» y en Faustu cumplióse dafechu. Asina ye que, como asturianos de pura cepa, inda con toes estes creencies en demonios, bruxes y pautos que nos ronden el maxín, mui enraigonaes na población, hemos tener cuidáu con nun «vender l’alma al diañu». Cuando hai crisis económica siempre acompangada d’otres crisis inda más graves, los diaños anden sueltos y persíguennos per uquier ufiertándonos «l’oru y el moru». Y volvamos a pensar na representación de Faustu. En cuanto duldaba, de los mesmos infiernos acudíen tolos diaños pa promete-y de too y p’alimentar la so participación en vicios y orxíes.

Tentaciones, males influencies, diaños, pautos? Nun se sabe bien ónde ta la llende ente la fantasía y la realidá. Yo pienso que los diaños tán ente nós, son de carne y güesu. Estos diaños son colos que tenemos que tener cuidáu. Teamos, entós, sollertes nesta época de pautos y promeses. Nun vayamos tener qu’arrepentinos y al poco tener que rescindir el pautu col «diañu».

Categoría: General Comentarios Comentarios (0)

Non a la violencia

admin (24 de junio, 2011)

31-5-2005
El crime enturbió la xornada del día dempués de las eleiciones.

Dempués d’esta xornada del 22-M, na que llibremente fiximos usu de la democracia, espertámonos al día siguiente con sobresaltu, espertámonos cola tristura del crime. Espertámonos una vez más cola impotencia ante los maltratadores y asesinos. El llunes la violencia y la llocura fixeron una vez más actu de presencia na nuestra sociedá. La traxedia de tres persones muertes y dos persones firíes de gravedá fíxonos espertar col corazón encoyíu.

Una vez más de llutu por víctimes de violencia ¿doméstica?, de ¿xéneru?, ¿machista? Violencia que nos castiga a diario. Silvia sufre nel hospital, mientres el so pá, el so compañeru y el so hermanu reciben tierra nel campusantu. Los sos neños nun escaecerán enxamás la escena que presenciaron.

Dempués del llargu día electoral, nel que Silvia de xuru que vivió con emoción, tres d’ella andaba la solombra del mal. La muerte rondaba la madrugada. L’ex maríu nun soportaba que la so ex muyer entrare nel mundu de la política. Envidia de los llogros femeninos. Una vez más tenemos que gritar, salir a la calle, reivindicar el non a la violencia, non a la violencia de xéneru. Ye difícil cambiar la mentalidá d’esta sociedá na qu’inda reina’l machismu en munchos llugares y situaciones. Namás una educación integral qu’impregne’l currículum escolar, la vida de los centros educativos, la vida familiar y la nuesa sociedá en xeneral podría dir abriendo’l camín de la llibertá.

Hai veces que les muyeres hasta llegamos a creer que nos falta poco p’algamar la igualdá. Pero les gotes de sangre derramaes por muyeres enturbien los regueros d’agua llimpia que flúin pel nuestru maxín y recuérdennos qu’entovía hai muncho camín por andar. Polítiques d’igualdá, llucha incansable dende diferentes instituciones, pero dalgo falla nel fondu de la sociedá. Dalgo falta por remover y soterrar. Nun podemos callar, nun podemos baxar la guardia mientres la violencia nos castigue per uquier. Esta vez los muertos fueron homes. L’asesín, n’ayén y enllenu de furia, llevóse too per delantre. Triste panorama. Esta vez tocónos bien de cerca.

Y col corazón apoyamos güei a Silvia, pa da-y fuerces pa siguir andando’l camín. De xuru que nel trayeutu tendrá d’alcontrar dalguna flor. De momentu les sos flores son los sos fíos que la esperen y la necesiten. Ánimu Silvia pa siguir lluchando. Ánimu a toes y a toos pa defender los drechos de les persones, los drechos de les muyeres, el drechu a la llibertá y a vivir una vida digna y en paz.

Categoría: General Comentarios Comentarios (0)

MAREONA

admin (24 de junio, 2011)

18-5-2011
Nesti momentu, ye necesario facer un repasu y ver qué partíos son tresparentes na so xestión.
Marea, movimientu de xube-baxa de la mar pol efeutu de la gravedá de la Lluna y del Sol. Cuando esti movimientu ye mui fuerte dizse qu’hai «marea viva».

Y voi referime a la marea qu’inunda estos tiempos Asturies, qu’afeuta a tolos asturianos y que ta provocada non precisamente pola atraición de la Lluna, sinón pola atraición fuertísima de les perres. Pol afán de ser ricu a costa de los demás. Tamos falando d’una «mareona» que nos sorprendió va unos meses y que nos inunda de rabia y d’impotencia, pensando qué responsables teníemos al frente de la xestión de la Conseyería d’Educación de la nuestra comunidá. Un tríu d’implicaos nesti casu de corrupción n’alministración, estafadores de fondos públicos, formen la «mareona» que nos afeuta nos caberos tiempos. «Marea viva», qu’enllenó de perres los sos bolsos y los de dalgunos empresarios del Principáu. Casu de corrupción del que cada día nos vamos enterando con más detalle, según se llevanta’l secretu de sumariu.

Mientres se recorten profesores, materiales, recursos pa los centros educativos o se masifiquen les clases p’aforrar perres, el máximu representante n’alministración educativa y les dos «collacies» implicaes ta confirmándose que taben malversando los fondos que son aportaos polos ciudadanos y ciudadanes, y que son nuesos. Ye dineru públicu. Los que de dalguna manera tuviemos venceyaos a esta alministración nes últimes décades nun podemos reprimir la indignación y repulsa a too esti esfalcu, consentíu, y ¿fechu? por daquién que lleva na «poltrona» varies décades. Más bien paecía que tenía pegamín nel asientu.

Tamos nun momentu importantísimu pa tolos asturianos. Acérquense les eleiciones pal día 22 y ye importante pensar a quién votamos pa gobernar los ayuntamientos y la comunidá autónoma. Pero esta vez, cuando la crisis nos castiga ensin duelu n’Asturies, cuando’l paru tien na probeza a munches families, cuando la mocedá tien que fuxir lloñe pa ganar el pan, cuando s’intenta dinamitar l’estáu de bienestar y, sobre too, cuando paez qu’anden sueltos finos «chorizos» que nos roben a estayu y ensin escrúpulu, hemos a pensanos muncho a quién tenemos que tener al frente de les nuestres alministraciones.

Tenemos que facer un repasu fondu, y ver qué partíos fueron tresparentes na so xestión. Qué partíos pueden dir cola cabeza bien alta porque nun tán chapicaos de corrupción en nenguna institución onde tuvieron poder. Reparar nos esfalcos, pelotazos, privatizaciones? y non facenos ilusiones coles promeses y más promeses de los que tán más interesaos nes promociones urbanístiques y na especulación que polos intereses de los ciudadanos y ciudadanes. Nin fianos de les promeses imposibles de partíos personalistes formaos por xente «rebotada» d’otres formaciones, que son como un caxón de sastre

Categoría: General Comentarios Comentarios (0)

Abril, mes de los llibros

admin (3 de mayo, 2011)

El mes nel que too florez col puxu de la primavera intentamos que florezcan tamién les lletres.
Cada mes del añu tien la so singularidá. El mes d’abril, yá bien entrada la primavera, ye’l mes dedicáu a los llibros y al mundu de la llectura. Un mundu fascinante que nos ayuda a vivir, a conocer y a comprender otres cultures y a fuxir de xemes en cuando, de la vida cotidiana. Llibros que nos lleven al pasáu y al futuru y que nos alimenten la fantasía. Dalgo tan importante nesti mundu de crudes realidaes.

«La cultura es leer, no sólo ver y oír». Son pallabres del doctor Carlos López Otín. Estes pallabres, en boca d’esti gran científicu, fáennos pensar una vez más na importancia de lleer y d’aportar a la cultura, nun mundu nel que, nel so llau escuru, reina la frivolidá y el consumu ensin llendes d’espectáculos basura. Frase ésta cola que finó la conferencia’l pasáu día 19, nel centru Cultural Valey de Piedrasblancas, esti catedráticu de Bioquímica y Bioloxía Molecular. Amás de toles felicitaciones y agradecimientos que se merez pola so dedicación al mundu de la investigación y por estensión a la meyora de la calidá de vida de la humanidá, aprovecho pa felicitalu, dende estes llinies, pola so forma de llegar al públicu, una forma didáutica y cenciella d’esponer la información pa que toos y toes comprendiéremos el mensax de les sos científiques pallabres.

Abril, mes primaveral y lliterariu, amás de les flores que broten de los árboles col bríu de xuventú, tamién florecen les actividaes al rodiu de la llectura. Actividaes pa tolos públicos. Una forma d’animar a la población a lleer, y de sacar a la calle’l mundu sorprendente de los llibros. Pa los escritores, editores y llibreros ye un mes especial, un mes de preparación y promoción pa que’l restu l’añu les lletres lleguen a tolos llares, al campu, a la playa, y a tolos requexos onde un llibru pueda tener el so llugar.

N’ Avilés celébrase estos díes la III Semana de la Edición y de la lliteratura independiente (SELIN), puntu d’alcuentru d’escritores, editores y sobre too llectores, y onde nun duldamos que podremos manosiar les páxines de los llibros más guapos ya interesantes. Los escritores participaremos en distintes actividaes y taremos allí p’avalar, cola nuesa presencia, esta invitación a la llectura. Quiciabes vos preste llevar nos llibros la firma del autor o autora. Ellí taremos pa estampar nos nuesos títulos unes pallabres pa caún de vosotros n’esclusiva. Pa que la nuestra palabra s’esparda per Avilés dende esi guapu parque de Las Meanas.

Por otra parte, el sábadu tenemos una xornada de Book Crossing, na que podrán participar tolos que-yos preste. Lliberar un llibru, dexalu nun llugar visible y protexíu pa qu’otra persona lu pueda disfrutar. Una biblioteca llibre y viaxera, que nun tien llendes nin estantes, y que circula per tol mundu. Una forma altruísta de compartir la llectura. N’Avilés tenemos esti sábadu a les siete la tarde una cita lliteraria. Nun podemos escaecela.

Categoría: General Comentarios Comentarios (0)

« Entradas Anteriores Entradas Siguientes »