Sortéu

admin (22 de diciembre, 2011)


El 22 ye un día señaláu nel que pue cambianos la vida.

La llotería ye un xuegu que tien a muncha xente ilusionao cuasique tol añu, pero, sobre manera, el «Sortéu de Navidá». Nestes feches son poques les persones que nun tienen en casa un tacadín de participaciones, y munches les que tienen una montonera de papeletes de tolos llaos. En cualquier llugar que frecuentamos, alcontrámonos con talonarios colgaos en sitiu bien visible. Talonarios d’asociaciones, clubes, peñes? porque la llotería nesti periodu ye un negociu redondu. Toos picamos, y más si te la ofrecen, nun vaya ser que te tean ofreciendo la suerte. Asina acabamos gastando munches más perres de les que teníamos pensao.

Y por fin llega’l día 22, el más esperáu d’esti mes. La televisión retresmite’l sortéu, en tiempu real. Puen visualizase n’internet los númberos premiaos y compartir l’allegría colos agraciaos. Lo que pasa que, nun momentu, acábase pa munchos tola maxa de los díes que preceden al sortéu, cuando toos esperamos polo menos un «plizquín».

Al rodiu d’esti eventu de xuegu cuéntanse munches anéudotes. Dende’l que pierde un billete premiáu, hasta falsificaciones, engañifes y, sobre too, desilusiones de los que confíen ciegamente en que-yos va a tocar, dempués de buscar el «numberu guapu». Nos díes pasaos vimos grandes coles de xente pa mercar un billete nes alministraciones a les que la suerte acudió dellos años y convirtiéronse nes «alministraciones de la suerte». Tamién tán los y les adivines o visionarios, qu’añu tres añu aseguren acertar el númberu que va a salir. O los que sueñen con un númberu y s’enfoten en buscalu onde seya. Too esto sin pensar que ta demostrao que les probabilidaes son les mesmes pa tolos númberos. L’ello ye que los agraciaos son namás unos pocos y los demás quedámonos cola copla de la resignación: «Lo primero ye qu’haya salú». La meyor llotería del mundu. Y a esperar la suerte pa otru añu.

Lo bono de too esto ye la ilusión que xenera. En tiempu de crisis ye cuando’l xuegu tien más allegaos, porque hai necesidá y búscase la suerte per uquier. Suel dicise que «la suerte hai que buscala», ye dalgo polo que toos naguamos, pero ye escurridiza, nun s’alcuentra tan fácil y esmuzse nun tris. Nun habrá nada más persiguío nel mundu. Quiciabes toos la topamos en dalgún momentu, pero ye como la felicidá, que nun dexa disfrutala por munchu tiempu.

Cuando lleáis estes llinies, podemos tener más cerca un «güelpe de suerte» y que nos toque «el gordu». Cuando lleáis estes lletres ya habrá xente brindando porque llegó la suerte y otros cola desilusión enriba la mesa y na so cabeza. Sin embargu, pal añu que bien llega de nuevo la ilusión y vuelve a repítise la historia. Tampoco ta mal. Ye una forma d’animar la vida anque seya por unos díes. ¡Suerte, amigos! ¡Feliz Nuechebona!

Categoría: General Comentarios Comentarios (0)