Cultura

admin (27 de octubre, 2011)

La cultura ye un bien social y ye fonte de desarrollu económicu.
Definir qué ye cultura y los elementos que la conformen podría ocupame casi tou esti artículu, pero voi centrame no que ye cultura como conxuntu de conocimientos que nos permite desarrollar el xuiciu críticu y enriquecenos como persones. Sin embargu, podemos dicir que la cultura alcuéntrase ente los «sufridores» y víctimes de les crisis, porque ye lo primero que sufre recortes. Sicasí, préstame facer unes reflexones al respeutu. Nun debiéremos escaecenos de que la cultura ye un bien social del que nun podemos prescindir. Ye instrumentu de cohesión que xenera riqueza y trabayu y ye elementu de xuntura de les persones que la disfruten; fomenta la participación ciudadana y ye quien a movilizar y motivar a los grupos. Pue dicise que ye la forma por escelencia de convivencia social, dalgo de lo que tamos faltos nesta sociedá, onde la indiferencia, l’egoísmu, l’individualismu y l’apatía, amáguennos de forma xabaz. D’otra miente, la cultura contribui al desarrollu afeutivu de les persones, y alimenta l’espíritu y el bienestar de la población.

Ricardo Muti, premiu «Príncipe de Asturias» de las Artes, 2011, criticó los recortes que se faen en cultura nel so país y n’otros países europeos. Al respeutu, argumentó qu’enantes que nada había «qu’educar a los políticos», acusándolos de nun pisar un teatru (ta visto qu’en tolos llaos cuecen fabes y na mio casa a calderaes). Debe ser que los políticos,, esmolecíos en trifulques ya intrigues palaciegues, y non tan palaciegues tienen pocu tiempu pa disfrutar tranquilamente d’actos culturales. Bien ye verdá que naide pue amar nin valorar lo que nun conoz. Muti fixo una encalorada defensa de la necesidá urxente de protexer la cultura. La cultura desempeña un papel esencial nel desarrollu humanu, y forma parte del bienestar social entendíu como conxuntu de factores que nos proporcionen calidá de vida. Un pueblu que nun pueda disfrutar de les diverses manifestaciones culturales ye un pueblu muertu. Nun podemos escaecer que la cultura, a la escontra de lo que tamos avezaos a oyer, ye un importante motor de desarrollu de la economía. Y hemos d’ entender que cultura albarca muncho más que les artes escéniques, tendencies y movimientos artísticos. Tamién xenera emplegu, salariu, intercambiu, etcétera. Según les fontes consultaes, na Unión Europea, la cultura mueve cinco millones d’emplegos y supón más del 3% del Productu Interior Brutu. Y n’España, xenera 400.000 puestos de trabayu y supón un 4 % del PIB. Sin embargu hai un desaxuste ente los ingresos que xenera la cultura y lo que s’emplega en midíes d’apoyu, subvenciones y demás. D’otra miente, les persones que trabayen nesti sector, tienen una mayor formación que la media, pero tienen sueldos más baxos y emplegu menos estable.

Pero, n’época de crisis, faise inda más importante que la cultura llegue a tolos estamentos sociales y que toos puedan disfrutar de les sos manifestaciones, porque la cultura nun pue ser privilexu de los más pudientes. Fai falta concienciación y sensibilidá política pa dignificar tolo que se mueve al rodiu de lo cultural.

Categoría: General Comentarios Comentarios (0)

Zorra

admin (27 de octubre, 2011)

Delles consideraciones sobre’l llinguax non sexista.

N’Asturies utilizamos la palabra raposa pa referinos a la zorra. Pero llamar raposa a una muyer nun tien les mesmes connotaciones que llama-y zorra. Ser raposa ye ser viva y astuta, qu’escuende los sentimientos y tien facilidá pa engañar. Y ser raposu significa lo mesmo. Sin embargo, cuando falamos de ser una zorra sabemos bien lo que significa, por muncho que’l xuez Del Olmo quiera convencenos de que llamar «zorra» a una muyer nun ye llama-y puta. N’asturianu, la zorra ye una fola grande de les que lleguen a la oriella ente otres menos intenses. Y zorra también ye la fema que nun queda preñada o quien escuende los sentimiento y les intenciones verdaderes.

Sicasí l’actu comunicativu ye muncho más complicáu y el significáu de les pallabres pue variar, pues nél xuegan un papel importante tolos elementos de la comunicación, ente ellos el contestu nel que se dicen, el llinguax non verbal, la entonación y demás. Dende hai unos años, venimos reivindicando por parte de distintes instituciones y coleutivos la utilización del llinguax non sexista, y faense verdaderos esfuerzos, y por veces, hasta dellos estropicios, col envís de nun discriminar a muyeres y homes. Toos sabemos del poder del llinguax, qu’influye fondamente nes actitúes, nel comportamientu y nes perceiciones. Poro, ye tan importante que vaya caltriando na sociedá l’interés por cuidar el bon usu de la llingua nesti sen.

D’otra miente, vemos lo difícil que ye cambiar les connotaciones de munches pallabres que formen parte del llinguax machista del que somos víctimes les muyeres. Y p’avivar el fueu fállase una sentencia d’esti calter, como la que fai unos díes dictó l’Audiencia Provincial de Murcia por parte del yá citáu xuez Del Olmo, que considera que cuando un home, nesti casu un maltratador, llama zorra a la so muyer ye pa destacar la so astucia. Ye una provocación pa tolos coleutivos que lleven tantu tiempu trabayando pola igualdá d’homes y muyeres.

Namás fai falta una rápida reflexón p’atopar una riestra pallabres que-y podríemos llevar al xuez machista, que tienen un significáu despeutivu en femenín y sin embargu en masculín son pa emponderar al machu.

A traviés del llinguax tenemos una perceición del mundu nel que nos desenvolvemos, y faise necesario adoutar formes nueves pa que cuaye una tradición non sexista del mesmu, hasta llegar a la so normalidá nel usu, por más que seya difícil cambiar les connotaciones que yá tienen delles pallabres, qu’ofienden y humillen a les muyeres. Sería bono saber, si daquién-y llamara «cabrón» al xuez Del Olmo, qué ye lo que llegaría a entender. Qué aceición del diccionariu diba escoyer y si-y prestara muncho’l calificativu

Categoría: General Comentarios Comentarios (0)