Branu caliente

admin (24 de junio, 2011)

Paez que se nos avecina un branu «caliente» y con munches tormentesMientres escribo esti artículu ta entrando’l branu. Un fenómenu invisible, pero que somos quien a sentir los sos efeutos. El Sol cai a plomu, calienta enforma y enllénanos d’enerxía. Sin embargu, pa que nun nos escaezamos de que tamos n’Asturies, güei el día despídese con un poco d’orbayu y de muga.

Nun vamos, de momentu, temer l’agua. Los espertos anuncien un branu calorosu, yo añadiría que se nos avecina un branu «caliente», con munches tormentes, non sólo de rayos y centelles, sinón tormentes de tou tipu. Esperemos que nun faigan munchos estragos nos nuesos «semaos». Si con tanta crisis la collecha s’estroza nun sé qué va ser de nós.

D’otra miente, el branu ye la estación qu’alimenta l’amor y espierta’l ferver sexual. Ye sabío que cola calor too miedra. Que miedre too, bona falta nos fai, a ver si d’una vez encomenzamos a salir d’esti tiempu de murnia y de nublina. Y esti añu al branu tamién se-y amiesta la calentura política, qu’estos díes ye pastu de los medios de comunicación. Esta temporada, podríemos dicir que los periódicos ficieron l’Habana a costa de los políticos, de la política, de los partíos, de los pautos y d’otres noticies que nesta época de tensiones, cambios y aterrizaxes, van enllenando de sensacionalismu los medios. El refugayu políticu da munchu xuegu a los «paparachis» de la política, qu’anden a la gueta de cualquier socesu, que por más que nun tenga demasiada importancia, ellos han convertilu nuna noticia sensacionalista que sorprienda a los llectores. Eso sí, arrimando l’ascua a la so sardina. El poder de los medios ye bien conocíu. Y esta época ye afayadiza hasta pa desenterrar noticies que se pueden volver aprovechar porque son rentables pa desprestixar a los oponentes y sacar los trapos puercos de debaxo les cames.

Menos mal que cuando lleáis estes llínies taremos preparándonos pa celebrar a lo grande la nueche San Xuan, cuando salen les xanes a calmar los ánimos de los desesperaos. Hai qu’andar con tientu porque les xanes, melosones elles, tamién tienen el so puntu de maldá y puen comportase como auténtiques bruxes. Y ta llaráu d’elles. Hailes per uquier. Neso ganámos-yos a los homes por goliada. Nestos tiempos que cuerren quemaránnos el sangre, pero nun puen quemanos na foguera. En dalgo s’hai que divertir. Esta ye la nueche les trasnaes. Ye la nueche ideal pa deprender les artes de la bruxería.

Bromes a parte, procuraremos quemar lo malo del añu na foguera y pidir bonos deseos. Garrarémos unes fueyes de xabugu pa colgales nes puertes de les cases y escorrer la maldá. Revolcarémonos ente la rosada pa tener bona salú. Cuando hai crisis enfotámonos más nestes ancestrales creencies. Con dalgo s’hai que consolar. Ente revolcones y folixa escaécense les penes. De toles maneres bona falta nos fairá que San Xuan y la Madalena nos acompañen.

Categoría: General Comentarios Comentarios (1)

Pautu

admin (24 de junio, 2011)

10-6-2011
Fuercia o ayuda imaxinaria cola que se llogra que les coses salgan como se quier.Pautu. Según el diccionariu d’ALLA. Aición y efeutu de pautar. Ponese d’acuerdu en daqué. Fuercia o ayuda imaxinaria cola que se llogra que les coses salgan como se quier.

Y voi referime, lo primero, a esta última aceición. N’Asturies «tener pautu» dizse daquelles persones que consiguen lo que quieren de manera fácil y casi siempre inesplicable, y que también puen influir nos demás pa consiguir d’ellos lo que-yos peta. Na nuesa cultura tamos na creencia de qu’hai persones que tienen pautu, ye dicir, pautu col diañu. Esos son los que tresmiten males influencies y males enerxíes y nun dexen olecer al próximu.

Estos díes la palabra pautu (o pactu) ta nos titulares y nes páxines centrales de tolos periódicos. Nun sabemos si tará o non el demoniu pel mediu, pero hai que tener munchu cuidáu porque demonios hai munchos per ahí sueltos y llueu, una vez que pactes col diablu, ye perdifícil escapase de les sos manes.

Y viénseme a la memoria la obra de teatru «Faustu» de Goethe, cola que s’estrenó’l Centru Cultural Valey de Piedrasblancas, con una inmeyorable puesta n’escena pol grupu «Higiénico Papel». Una obra maestra que da muncho pa falar y da muncho más pa pensar. Faustu pauta col diañu y viénde-y la so alma. Dende aquel momentu enxamás recupera la calma. Eso sí, lliberóse de tolos prexuicios sociales, vivió tolos placeres mundanos y disfrutó de tolos vicios, siempre col diañu a la vera, martiellándo-y la cabeza. Pero, como diz el refrán, «quien mal anda, mal acaba» y en Faustu cumplióse dafechu. Asina ye que, como asturianos de pura cepa, inda con toes estes creencies en demonios, bruxes y pautos que nos ronden el maxín, mui enraigonaes na población, hemos tener cuidáu con nun «vender l’alma al diañu». Cuando hai crisis económica siempre acompangada d’otres crisis inda más graves, los diaños anden sueltos y persíguennos per uquier ufiertándonos «l’oru y el moru». Y volvamos a pensar na representación de Faustu. En cuanto duldaba, de los mesmos infiernos acudíen tolos diaños pa promete-y de too y p’alimentar la so participación en vicios y orxíes.

Tentaciones, males influencies, diaños, pautos? Nun se sabe bien ónde ta la llende ente la fantasía y la realidá. Yo pienso que los diaños tán ente nós, son de carne y güesu. Estos diaños son colos que tenemos que tener cuidáu. Teamos, entós, sollertes nesta época de pautos y promeses. Nun vayamos tener qu’arrepentinos y al poco tener que rescindir el pautu col «diañu».

Categoría: General Comentarios Comentarios (0)

Non a la violencia

admin (24 de junio, 2011)

31-5-2005
El crime enturbió la xornada del día dempués de las eleiciones.

Dempués d’esta xornada del 22-M, na que llibremente fiximos usu de la democracia, espertámonos al día siguiente con sobresaltu, espertámonos cola tristura del crime. Espertámonos una vez más cola impotencia ante los maltratadores y asesinos. El llunes la violencia y la llocura fixeron una vez más actu de presencia na nuestra sociedá. La traxedia de tres persones muertes y dos persones firíes de gravedá fíxonos espertar col corazón encoyíu.

Una vez más de llutu por víctimes de violencia ¿doméstica?, de ¿xéneru?, ¿machista? Violencia que nos castiga a diario. Silvia sufre nel hospital, mientres el so pá, el so compañeru y el so hermanu reciben tierra nel campusantu. Los sos neños nun escaecerán enxamás la escena que presenciaron.

Dempués del llargu día electoral, nel que Silvia de xuru que vivió con emoción, tres d’ella andaba la solombra del mal. La muerte rondaba la madrugada. L’ex maríu nun soportaba que la so ex muyer entrare nel mundu de la política. Envidia de los llogros femeninos. Una vez más tenemos que gritar, salir a la calle, reivindicar el non a la violencia, non a la violencia de xéneru. Ye difícil cambiar la mentalidá d’esta sociedá na qu’inda reina’l machismu en munchos llugares y situaciones. Namás una educación integral qu’impregne’l currículum escolar, la vida de los centros educativos, la vida familiar y la nuesa sociedá en xeneral podría dir abriendo’l camín de la llibertá.

Hai veces que les muyeres hasta llegamos a creer que nos falta poco p’algamar la igualdá. Pero les gotes de sangre derramaes por muyeres enturbien los regueros d’agua llimpia que flúin pel nuestru maxín y recuérdennos qu’entovía hai muncho camín por andar. Polítiques d’igualdá, llucha incansable dende diferentes instituciones, pero dalgo falla nel fondu de la sociedá. Dalgo falta por remover y soterrar. Nun podemos callar, nun podemos baxar la guardia mientres la violencia nos castigue per uquier. Esta vez los muertos fueron homes. L’asesín, n’ayén y enllenu de furia, llevóse too per delantre. Triste panorama. Esta vez tocónos bien de cerca.

Y col corazón apoyamos güei a Silvia, pa da-y fuerces pa siguir andando’l camín. De xuru que nel trayeutu tendrá d’alcontrar dalguna flor. De momentu les sos flores son los sos fíos que la esperen y la necesiten. Ánimu Silvia pa siguir lluchando. Ánimu a toes y a toos pa defender los drechos de les persones, los drechos de les muyeres, el drechu a la llibertá y a vivir una vida digna y en paz.

Categoría: General Comentarios Comentarios (0)

MAREONA

admin (24 de junio, 2011)

18-5-2011
Nesti momentu, ye necesario facer un repasu y ver qué partíos son tresparentes na so xestión.
Marea, movimientu de xube-baxa de la mar pol efeutu de la gravedá de la Lluna y del Sol. Cuando esti movimientu ye mui fuerte dizse qu’hai «marea viva».

Y voi referime a la marea qu’inunda estos tiempos Asturies, qu’afeuta a tolos asturianos y que ta provocada non precisamente pola atraición de la Lluna, sinón pola atraición fuertísima de les perres. Pol afán de ser ricu a costa de los demás. Tamos falando d’una «mareona» que nos sorprendió va unos meses y que nos inunda de rabia y d’impotencia, pensando qué responsables teníemos al frente de la xestión de la Conseyería d’Educación de la nuestra comunidá. Un tríu d’implicaos nesti casu de corrupción n’alministración, estafadores de fondos públicos, formen la «mareona» que nos afeuta nos caberos tiempos. «Marea viva», qu’enllenó de perres los sos bolsos y los de dalgunos empresarios del Principáu. Casu de corrupción del que cada día nos vamos enterando con más detalle, según se llevanta’l secretu de sumariu.

Mientres se recorten profesores, materiales, recursos pa los centros educativos o se masifiquen les clases p’aforrar perres, el máximu representante n’alministración educativa y les dos «collacies» implicaes ta confirmándose que taben malversando los fondos que son aportaos polos ciudadanos y ciudadanes, y que son nuesos. Ye dineru públicu. Los que de dalguna manera tuviemos venceyaos a esta alministración nes últimes décades nun podemos reprimir la indignación y repulsa a too esti esfalcu, consentíu, y ¿fechu? por daquién que lleva na «poltrona» varies décades. Más bien paecía que tenía pegamín nel asientu.

Tamos nun momentu importantísimu pa tolos asturianos. Acérquense les eleiciones pal día 22 y ye importante pensar a quién votamos pa gobernar los ayuntamientos y la comunidá autónoma. Pero esta vez, cuando la crisis nos castiga ensin duelu n’Asturies, cuando’l paru tien na probeza a munches families, cuando la mocedá tien que fuxir lloñe pa ganar el pan, cuando s’intenta dinamitar l’estáu de bienestar y, sobre too, cuando paez qu’anden sueltos finos «chorizos» que nos roben a estayu y ensin escrúpulu, hemos a pensanos muncho a quién tenemos que tener al frente de les nuestres alministraciones.

Tenemos que facer un repasu fondu, y ver qué partíos fueron tresparentes na so xestión. Qué partíos pueden dir cola cabeza bien alta porque nun tán chapicaos de corrupción en nenguna institución onde tuvieron poder. Reparar nos esfalcos, pelotazos, privatizaciones? y non facenos ilusiones coles promeses y más promeses de los que tán más interesaos nes promociones urbanístiques y na especulación que polos intereses de los ciudadanos y ciudadanes. Nin fianos de les promeses imposibles de partíos personalistes formaos por xente «rebotada» d’otres formaciones, que son como un caxón de sastre

Categoría: General Comentarios Comentarios (0)