Centru Cultural Valey

admin (4 de febrero, 2011)

Una tarde de lluvia fizo más romántica la inauguración del centru cultural Valey en Piedrasblancas
El pasáu vienres, el centru cultural Valey abría les sos puertes a les siete la tarde. La nuesa alcaldesa, Ángela Vallina de la Noval y el conceyal Iván Patiño recibiéronnos na plaza d’Europa, baxo’l paragües, emocionaos. Cola satisfaición y l’arguyu de ver cumplíu esti gran proyeutu, tan esperáu por toos. Los sones de la banda de gaites l’Alborcer dieron la bienvenida a les autoridaes y al numberosu públicu asistente.

La lluvia caía a chuzos, como si’l Nuberu tamién quixera sumase a la celebración. Una manera guapa de dar la norabona a tolos que, col so esfuerzu, fixeron posible que Castrillón se convierta nun referente cultural na comarca avilesina y tamién n’Asturies. Pero más porque se remataba un proyeutu importante y al empar aniciábase una nueva etapa cultural pa los castrillonenses.

Amás de la esposición «Rastros e indicios», el Valey abriónos les sos puertes col espectáculu «Nos queda la zarzuela». Una antoloxía de fragmentos esbillaos ente les pieces más representatives del xéneru, interpretaes por artistes de la talla del barítonu David Menéndez, que por más señes ye castrillonense. De los que van llevando pol mundu alantre la so voz y el so valir, pero que tamién lleva con arguyu el nome de Castrillón. Volver a casa con un carráu d’ésitos al llombu, magar la so mocedá, debe ser bien prestoso. Tamién el gran tenor Jorge Rodríguez Norton, avilesín de Miranda. Entrambes voces dexaron nidio’l valir d’estos dos artistes asturianos. Pero los que vinieron de fuera tuvieron a l’altura de los de casa. Nun hai dulda. L’ésitu escénicu de la sopranu Sabina Puértolas tuvo más que probáu. Brillante, gayaspera, espléndida. Cola so voz foi quien a tresportanos a otres realidaes. Voces arrollaes pola maraviosa actuación de la OSPA, Orquesta Sinfónica del Principáu d’Asturies, y coles prestosísimes intervenciones de los númberos interpretaos pol «Coro Capilla Polifónica Ciudad de Oviedo», amás de la escelente puesta n’escena del actor Xuacu Carballido.

Nun hai dulda de qu’amás de contar con infraestructura pa cualquier tipu d’actos culturales, tenemos artistes de casa, del altor de los que nos deleitaron el pasáu fin de selmana nel Valey y otros que siguirán llegando a lo llargo de los próximos meses. Ye pa tar doblemente arguyosu.

Güei, más que nunca, fáisenos urxente ufiertar a la población la posibilidá de disfrutar del arte y, en xeneral, de la cultura. Concentrar a la xente al rodiu d’una actividá cultural ye perimportante. Cola cantidá de «basura» que nos amaga per uquier, el poder asistir a actividaes d’esti calter, poder fuxir por un tiempu de lo cotidiano, ufiértanos momentos de felicidá, y ye dalgo qu’alimenta l’espíritu. Faise necesario devolver a les persones l’optimismu y la esperanza. Nun ye que namás se consiga viendo un espectáculu, pero tamién sabemos qu’ello ye una forma de facer correr les endorfines pel sangre. Una terapia qu’amenorga la tristura que sufre la nuesa sociedá, enferma d’incomprensión, de soledá, de violencia, d’egoísmu y de falta d’empatía.

Categoría: General Comentarios Comentarios (0)