Balance

admin (14 de octubre, 2010)

Balance
Lo malo de la romería ye lo que queda pal otru día

De xuru que yá escribí otres veces un artículu col mesmu títulu, porque ye cierto, que nos pasamos la vida faciendo balance de lo que nos va ocurriendo a diario, de los nuesos actos y de lo que sucede al nuesu alredor.

Güei dispóngome a facer balance sobre les fiestes de branu, que se fueron despidiendo, pa dar pasu al otoñu, que yá s’estrenó con una bona airada y amagónos con una «cicloxénesis» o una «bomboxénesis» (siempre tamos aprendiendo pallabres nueves). Los medios de comunicación diéronse n’alarmar a la población, y polo menos con una selmana d’antelación yá nos tán metiendo’l mieu nel cuerpu y encamiéntennos non salir de casa. Sicasí como somos tan mal mandaos y paez que nos gusta’l riesgu, intentamos burllar al Ñuberu cuando determina aguanos les fiestes. Estos primeros díes d’otoñu, hubo fiestes en dalgunos puntos d’Asturies. Yo pudi disfrutar de les que se celebren en Belén de Valdés, los díes 3 y 9 d’ochobre: «Belén» y «Belenín». Nun tuviemos muncha suerte col tiempu. El día de Belén hubo que suspender la comida nel campu, dempués de tener les meses puestes pa casi 500 persones. Tamién hubo que volver a les orquestes pola mor del temporal qu’amagaba. Pero non too foi malo. Una rayadina al mediudía dexó sacar a la Virxe en procesión. Darréu, el dúu Marfil, de Castrillón, empobinóse a Belén «contra vientu y temporal», y atechaos nel local social «Las Escuelas», diéronnos una animadísima sesión vermú pa los más atrevíos, pa los que llegaron a Belén inda col tiempu a la escontra. Yá entrada la nueche, llegó l’anunciáu temporal y fixo grandes estrozos pel campu. Llevó meses y sielles y tamién llevó dellos puestos d’artesanía que taben montaos pa la ocasión.

El día 9, Belenín, tuvo dalgo más mansu, anque l’augua y la muga humedecieron el campu. La música de les orquestes acertó a espantar en parte el temporal, al empar qu’un públicu folixeru, col paragües abierto, ximelgaba l’esqueletu pa entrar en calor. Les orquestes «Panorama» y «Jerusalén» dieron en Belén un perguapu espectáculu, hasta casi l’amanecer.

De les fiestes y romeríes lo peor ye al otru día. Dexando a parte el cansanciu, el sueñu y demás efeutos de noctambulismu, al día siguiente, el campu la fiesta espierta sonámbulu, soyáu de vasos, botelles, papeles, lates y plásticos. Eso ye lo que nun presta un res. Cómo ye posible qu’esta mocedá y los non tan mozos nun piensen que tamos nun espaciu públicu y que tolo que se tira al suelu daquién tien que dir detrás a recoyelo. Al otru día la fiesta, a los organizadores tóca-yos sesión llimpieza. Toca recoyer la basura festiva. Pero esto nun pasa sólo en Belén. Esto pasa en toles fiestes y romerías. L’espaciu onde se celebren amanez enlleno «mierda». Fai falta concienciar a la xente de nun emporcar. A dalgunos fai-yos falta una bona dosis d’educación cívica y mediuambiental.

Anuncios Google

Categoría: General Comentarios Comentarios (0)

Fuelga 29-S

admin (7 de octubre, 2010)

La fuelga del 29-S llega con retrasu
Fuelga. Aición y efeutu de folgar. Protesta de los trabayadores cuando nun tán conformes nel so trabayu. Esta ye la definición que nos da’l diccionariu de l’ALLA. Lo peor ye que nel casu que m’ocupa, la fuelga xeneral del pasáu día 29, hai dalgunos que nun pudieron nin siquiera participar nella pa protestar pola so situación. Refiérome a los paraos. Eso sí, podrán manifestase, si ye que tienen fuerces pa ello. Eso de folgar, que bien se nos da a toos. Si pensamos nesta situación de paru, qu’hai que folgar por obligación, por cuatro perres que nun dan cuasique nin pa malvivir una familia y col tiempu emburriando detrás, folgar yá nun ye tan prestoso. Darréu se ven namás cola ayuda familiar que significa pasar fame si nun disponen d’otra “ayuda familiar”, lléase de los sos familiares. Esto ye una situación qu’a naide-y gusta y que ta xenerando cuadros mui duros nes families que lo sufren. Y ¿cuála ye la familia que nun tien dalgún paráu más o menos cercanu? Nun sé pa lo que sirvirá esti día de fuelga. Zapatero, el máximu responsable de la situación de crisis que ta viviendo’l nuesu país, yá dixo pela mañana a los medios que “él diba a trabayar”. Debe ser pa dar dar exemplu.

La fuelga del 29-S ta de sobra xustificada, cuando sabemos que non sólo se ta cociendo’l nuesu futuru, el de los trabayadores, paraos, pensionistes y demás, sinón tamién el de los nuesos fíos y nietos, munchos n’edá llaboral. Porque esta reforma y tolos recortes sociales que lleva empareyaos, van a afeutar a unes cuantes de les próximes xeneraciones. La situación ye grave: rebaxa de los sueldos, conxelación de pensiones, abaratamientu del despidu y trabayar hasta que nun puedas coles pates, porque la edá de xubilación tamién se va a cambiar pa más vieyos. Esa ye la herencia que van recibir los nuesos fíos y nietos. Nun sabemos los efeutos que va tener esta fuelga, pero pue ser l’aniciu pa dir a la gueta d’otres midíes. Poro, tenemos que lluchar pa que se busquen otres soluciones que nun pasen por esfarrapar l’estáu de bienestar que teníemos consiguío.

Habrá que reducir gastos innecesarios, habrá que mirar poles perres publiques y frenar l’ espilfarru que ye muncho. Que se grave a los que tienen grandes posesiones y deben pagar. Les perres nun pue ser que salgan namás del sueldu de los trabayadores. Yá ta bien de favorecer a les grandes fortunes y capitales. Dellos pagando impuestos ridículos en comparanza colo que pagamos los trabayadores. Y sobre too, qu’esti gobiernu ponga los medios pa crear puestos de trabayu. Nun se pue sostener tanta xente folgando poles esquines, a la escontra de la so voluntá, y la mayoría d’ellos malviviendo.

Categoría: General Comentarios Comentarios (0)