Escribir de política

admin (16 de septiembre, 2010)

Paez que me ta prestando la idea de dedicame a comentarista de lo que faen gobiernu y oposición
A toos nos pasa. Dempués d’ocho años escribiendo nesta seición, procurando escribir artículos de toa mena, temes d’actualidá, coses más o menos prestoses, col envís de que faigan a la xente pasar un ratín agradable, y evadise de les calamidaes que nos amaguen, llega un momentu que “toca artículu” y hai qu’encomenzar a pensar nel tema más afayadizu. Anque estos años procuré nun escribir de política, porque eso ye un tema qu’ocupa yá munches páxines nel periódicu, toi pensando que cuando nun se m’ocurra darréu un tema pa escribir, voi dedicame a ser comentarista política. Eso ye lo que más viende. Tampoco fai falta muncho pa esto. Tener un poco de rollu, y ya ta. La mentira ta permitida nestos temes, y entós ye too mui fácil.

Güei métome con Zapatero pola Llei de Reforma Llaboral y póngalo pingando por nun pensar lo bien que tábemos col cacariáu Estáu de Bienestar, que nos lo va quitar, de xuru, esti home con pinta vampiru. Amás porque nos conxela les pensiones, y va acabar colos viaxes del Inserso. Y, entós, ¿ónde se van namorar los vieyos? Pal próximu artículu aplaudo’l determín de Zapatero porque, dempués de reflexonar sobre la so política, ye bona verdá que dalgo hai que facer, y los primeros que tienen qu’apretar el cinturón son los probes. Pa eso van tener recompensa nel Reinu de los Cielos. A los poderosos y ricos diba facése-yos muncho más abegosu apretase’l cinturón y trabayar duro. Nun tán avezaos, y el «bolortu de vieyu nun retuerce». Dicíalo mio güela que yera mui llista y sabia. Amás, dalgunos tán mui gordos y nun puen apretar nada. Que pasen fame los probes que tienen espíritu de sacrificiu.

Pa otra selmana métome col PP, porque son unos «carcas», homes de Cromañón, que quieren volvenos al pasáu. Rajoy ta histéricu perdíu porque quier, a costa de lo que seya, llegar a la Moncloa y tener ellí una bona poltrona. Pa la selmana siguiente, afalago a los “peperos” y digo que bona falta fai daquién que nos tenga de la rienda, porque too esto ye un esmadre.

Y pa otra tóca-yos a los d’Izquierda Unida, por progres y lliberales, por ser unos folixeros y porque nun ponen torgues a toa esta gandaya qu’anda suelta pente nós. Pa la selmana siguiente voi da-yos coba y dicir que son los meyores, porque nestos tiempos que cuerren daquién tien que ser consciente de que queremos la llibertá nel so más ampliu sentíu de la pallabra. ¿Y qué? Tengo tema pa un mes. Y como naide fai casu de tolo qu’escribimos de política, porque’l pueblu ta fartucu de lleer tochures, pues torno a encomenzar otra vez: que si éstos lo faen perbien, que si los otros tamién, que si son los meyores, que si a los otros hai que correlos a palos… Y, asina, alredor de toos estos nuesos políticos y alredor de la política cubro’l mio periodismu d’un añu. ¿A que ye mui fácil?

Categoría: General Comentarios Comentarios (2)

Queremos ríos llimpios

admin (3 de septiembre, 2010)

Ye muncho más fácil non tirar basura que tener que recoyer lo qu’otros, de forma irresponsable, tiren al ríu.
El pasáu sábadu, la parroquia de La Montaña (Valdés) dedicó tol día a la llimpieza del Ríu Negru. Cuarta sestaferia madiuambiental que vien organizando l’Asociación de Vecinos «Virgen de Belén», dende hai tres años, con una participación significativa por parte d’un bon grupu de vecinos de la parroquia. Concienciaos de la importancia de mantener el ríu llimpiu. Nesta actividá axuntóse xente de toles edaes, dende los cinco años hasta más d’ochenta. En total, participaron un centenar de persones, ente organizadores, cocineros, y los encargaos de preparar y llevar la xinta al ríu, y otros llabores. A La Montaña llegó xente de distintos puntos que vinieron a ayudar y sofitar cola so presencia esta iniciativa. Ye de destacar la nutrida participación del Grupu de Montaña Estoupo de L.luarca. Tamién llegaron a La Montaña voluntarios de Xixón y de Madrí.

Tuviemos la prestosa visita y participación d’Alfonso Guillán Domínguez, téunicu de Voluntariado en Ríos (Ministerio de Medio Ambiente y Medio Rural y Marino), que vieno dende Madrí ya implicóse nes llabores de llimpieza del ríu. Él foi quien coordinó y supervisó’l Proyeutu qu’unviamos a Voluntariado en Ríos, institución mediuambiental que nos lo financia.

L’Alcalde de Valdés, Juan Fernández Pereiro, sofitó cola so presencia esta actividá, acompañándonos nesta xornada tan importante. Amás del apoyu loxísticu aportáu pol Ayuntamientu de Valdés.

La sestaferia terminó con una costiellada pa los participantes y darréu un animáu baille. Nada hai tan guapo como festexar una actividá madiuambiental, non sólo pola gran cantidá de basura que se retiró del ríu Negru, sinón porque pensamos que l’ésitu d’esti proyeutu ye la participación a tolos niveles, dende la redaición del mesmu y la organización de les actividaes que se proponen, hasta’l control y espardimientu de tolo que lleva al so alredor, entamando asina una nueva rellación de querencia col nuestru ríu, como nos diz el mensaxe que recueye’l títulu del Proyeutu: «Nuestro río forma parte de nuestra vida».

Nel Proyectu recuéyense otres actividaes empobinaes a la educación ambiental d’escolares y públicu en xeneral, ente elles un concursu de fotografía, que yá se fixo. Les fotos del ríu Negru tán espuestes nel local Social «Las Escuelas», en Belén, pa que la xente pueda contemplar los guapos requexos que tien el nuestru ríu. Tamién convocaremos en próximes feches un concursu de redaición pa escolares y charles informatives sobre la importancia de conservar el mediu que nos arrodia.

Tanto la Xunta Direutiva de l’Asociación de Vecinos «Virgen de Belén» como los voluntarios participantes quedamos satisfechos d’esta xornada de llimpieza y esperamos que, sobre too, sirva para sensibilizar cada vez a más xente sobre’l peligru que supón contaminar los ríos y l’entornu. Ye muncho más fácil non tirar basura que tener que recoyer lo qu’otros, de forma irresponsable, tiren al ríu.

Pensemos cuánto daríen n’otros llugares secos del Planeta por tener un ríu como’l nuesu, como los nuesos. Por tener abundancia d’agua en ríos y fontes. Conservémoslos llimpios.

Categoría: General Comentarios Comentarios (0)