Sapos, ranes y sapagueres

admin (30 de junio, 2010)

Estos animales anfibios formen parte de la maxa y les creencies populares nes aldees d’Asturies.
Sapos, ranes y sapagueres, toos ellos son anfibios. El sapu de piel seco y áspero y la rana cola piel más húmedo y más lliso, con aspeutu un poco más agradable, xunto cola sapaguera y otros más, son animales que viven alredor de la quintana, sobre too en llugares húmedos y onde empoza l’agua. Sapos, ranes y sapagueres anque seyan de families distintes, dende’l puntu de vista etnográficu, tienen pa nós, un calter máxicu asemeyáu. Por eso voi referime a ellos pa cuntar delles curiosidaes y creencies populares que se viven nes aldees d’Asturies. Anque cola nueva manera de realizar los llabores na casería, más bien too con maquinaria, nun se tien agora’l mesmu contautu con estos y otros animales. Amás, dende hai unes décades, rexístrase en tol mundu una merma na población de los anfibios, fenómenu que ta documentáu como ún de los amagos más críticos de la biodiversidá global.

El sapu siempre foi consideráu n’aldea como animal velenosu y hai la creencia de que tien dalgo de parte col diañu y les bruxes. Al so alredor aliméntense munches creencies fantástiques. El sapu ye protagonista en munchos rezares pa facer rituales máxicos y curaciones. Esti animal retrepu y siempre sollerte, cola mirada fixa, tien una solombra de misteriu. En dalgunos países, como Chile y Perú dizse «sapu» a los mirones y a los espíes. Nós llamamos «sapu» a quien amuesa torpeza de movimientos. Cuando daquién s’engafa y diz maldiciones y reniegos, dizse «que’echa sapos pola boca» y quien aguanta situaciones inxustes «traga sapos y culiebres».

Ye creencia popular que’l mexu de sapu pue tresmitir el coxíu, una malura que se manifiesta con granos, buéchigues na piel y comiciu y que puen llegar a infestase. N’aldea a too se-y busca una causa. El coxíu tamién lu tresmiten les arañes y les sapagueres. Sicasí pa too hai remedios caseros. El coxíu cúrase untando les buéchigues con ceniza del llar y diciendo nueve veces, nueve díes unes palabres máxiques, recitaes con fe por quien ta en posesión del poder de curar. El primer día nueve veces y vei menguándose, p’acabar l’últimu día recitando’l rezar sólo una vez:

Cuxíu de cuxidar

¿Qué vienes aquí a buscar?

A oler ya llamber

ceniza del l.lar.

Si sos de sapu, veite al furacu.

Si sos de sapaguera, veite a la l.lera.

Si sos de culuobra, veite a la cuova

Si sos de sabandijas, veite a las rendijas.

Alcontrar un sapu muertu ye peligrosu. De neños tábemos alvertíos de que nun lu tocáremos porque podíen tresmitir «les espines», otra malura que tamién pue garrase de les culiebres o sapagueres muertes. Casi siempre suel garrase nos didos, pero si nun se-y pon remediu, estiéndese l’hinchazón a les manes y hasta’l brazu. Ye mui dolorosu y si nun se garra a tiempu, quien tien les espines pue morrer rabiando de dolores.

Pa curar esta gafura que tresmite’l sapu, hai un ritu qu’ entovía se prautica por dalgunes muyeres nos pueblos. «Gárrase un cachu tocín y caliéntase al fou d’una vela prendida, y con cuidáu, vei arimándose’l tocín caliente a la parte infestada, y déxase cayer la grasa, que se vei derritiendo, poco a poco, sobre «les espines», restregando siempre de dientro pa fuera, al empar que se dicen estes palabres máxiques:

Espina maldita.

¿Qué vienes aquí a buscar?

Toucín del pote ya ceniza del l.lar,

Si sos de culuobra, veite a la cuova

Si sos de sapu, veite al furacu,.

Si sos de sapaguera, veite a la l.lera».

Según se vei diciendo esti rezar, vese cómo van saliendo les espines del deu o de la parte infestada. Salen como si fueren unos filinos, llargos y mui delgadinos, que son los que causen el mal.

Estes palabres hai que repetilu nueve díes, pa quedar bien curáu. Esti ritu tien variantes n’otres partes d’Asturies. Luciano Castañón diznos nel so llibru Supersticiones, «Hai infeiciones de la piel que se cree que son causaes pol orín del sapu. (…) Hai que llavar la zona afeutada con agua que pasara pol rodeznu d’un molín. Otres veces cúrense con ceniza y cuspe y diciendo unes palabres asemeyaes a les anteriores, a les que s’amiesta:

«(…)Con ciscu de llar

Ya cuspe de boca

Santo serás, Amén».»

Palabres asemeyaes a les que se dicen pa curar el coxíu, como se pue observar. Según la xente ye un rezu mui eficaz.

En dellos pueblos ye creencia popular que los sapos caen de les nubes. Dicen que los llevanta l’aire y que los lleva a otros llugares. Les nubes tán entós cargaes de sapos y cuando llueve fuerte, los sapos caen mezclaos col agua y acaba cayendo una «bastiazu» de sapos. Estes fantasíes formaben parte de los socesos sobre fenómenos atmosféricos y otros socesos máxicos que se cuntaben y s’afirmaben nos filazones.

Cuando hai bon tiempu y atopamos dalgún sapu pel suelu, dizse que traen l’agua.

Onde canta’l sapu/ antes d’abril, /la nieve ta por venir.

Tamién les sapagueres yeren anuncia d’agua. Cuando llovía atopábense en cualquier requexu. Debaxo les piedres, nos furacos, ente la yerba moyada y no mediu’l camín. A veces dos otres xuntes.

Pa nós la sapaguera ye un animal al que se-y tien abondo respetu.Ye creencia que’l so guapu color mariellu ye seña de tol velenu que tien dientro, y completase l’alvertencia col dichu tan esaxeráu «si te muerde una sapaguera garra la pala ya veite a la ilesia». Anuncia d’entierru, por supuestu. La sapaguera ye una especie de monstruu mitolóxicu, un animal resistente a too, inclusive resiste al fou, y que si se-y corta’l rabu vuelve a medrái. Con esta mala sombra, pa los neños d’aldea, estos animalucos siempre nos produxeron mieu y congoxa. Ye dalgo cultural, casi siempre bien difícil de desprendese d’ello.

Otru ritual bien afitáu n’aldea ye’l que se facía pa bendicir les tierres. Na mio zona, en La Degol.lada, facíase’l día San Marcos. Esi día, bendicíense les tierres con un ramín de lloréu,del que se bendixere’l Domingu de Ramos. Diba moyándose n’agua bendito de lo que se tien en casa, bendito’l Sábadu de Gloria. No mediu de cada tierra semada, llantábase un ramu, dempués de moyalu nel agua y bendicir la tierra. Dempués de facer una cruz nel aire, santiguase y dicir una oración. Too pa escorrer la comia de les sementeres:

«Afuera sapos ya ratos

ya toda la maldición

Qu’aquí vos traigo l’augua bendita

ya’l ramu de la pasión».

Otra vez el sapu ta entre los animales malditos que nun se-yos tenía bon aquel.

Al escurecer, podíes velu nel mediu’l camín o nes escaleres de la casa, na corrada y ondequiera. Había que tener cuidáu de nun pisalos, porque yera abondo desagradable. Tengo’l recuerdu d’un día que me descalcé pa xubir a una figal que medraba a la vera la mio casa. Descalcéme como faciemos davezu pa xubir a los árboles, quiciabes porque asina s’agarraben meyor los pies a les canes. Esi día, nuna especie d’asientu qu’había nel tueru la figal, taba aseñoráu un sapu grandón, escucando o dormiendo. Yo nun lu vi y pisélu ensin querer. Los glayíos que di sintiéronse en tol pueblu del noxu que me dio pisar aquel sapu grandón y retrepu.

Los sapos tamién yeren munches veces víctimes de bribonaes que-yos facíen los neños, como da-yos un cigarru a fumar.

Sin embargu, el sapu, magar ser un animal que se-y rellaciona con bruxes y bruxeríes, ye n’Asturies protagonista de cuentos y versos. Nun dexa de ser curiosu qu’apaeza nun cuentu rellacionáu cola raposa, por exemplu.

El sapu ya la raposa

Yera una vez que diba la raposa pol monte ya víu un fou. Alcontróuse con un sapu, ya diz-y el sapu:

-Oye, Marica, vien ahí’l fou

Ya diz-y la raposa:

-Ya tu ¿Cuántas mañas sabes pa l.librate del fou?

Ya diz-y el sapu

-You una sola, ¿ya tu?

Diz ella, you sei mil mañas.

Chegou’l fou, ya’l sapu metéuse debaxo d’una piedra, ya cuando pasóu’l fou, salíu’l sapu, y vio que taba la raposa toda queimada ya díxo-y

-Á, mil mañas ¿riste o regañas?

Les ranes yeren pa nós animales un poco más agradables. Prestábanos sentir el so cantu al escurecer. Daquella, sobre too en primavera, tolos escureceres sentíamos el cantu de la rana, en tolos llugares onde había agua empozada. Chocábanos abondo la so mirada sollerte y cómo saltaben d’un llau pa otru pente los xuncos y el mofu.

Cerca de la mio casa formábase una poza, delantre d’una fonte d’iviernu. Al nun ser mui fonda, nosotros podíamos xugar col agua y coles cuyarines, que corríen d’un llau pa otru, moviendo’l rabu. Agarrábemosles cola mano y les metíemosles en frascos pa observar bien cómo se movíen ente l’agua. Yeren pa nós dalgo máxicu qu’alimentaba la nuesa fantasía. Hores y hores estraguayando les manes naquel agua revuelto, onde tamién xugábemos colas «guórgolas» (güevos de rana), que s’esgolaben pente los didos y figuraben formes prestoses. La poza La Fontanica yera’l llugar d’alcuentru, de los nenos y pasábemos ellí les hores xugando y contemplando la guapura de la Naturaleza. Nestes caberes décades, tristemente, colos cambios de clima fueron secando fontes. Güei, La Fontanica ye una poza seca.

Los neños creíemos que la rana yera la moza’l sapu, y prestábanos repetir esti cantar

Taba la rana debaxo d’un sucu.

Chegóu un sapu ya dio-y un chuchu.

Dixo la rana, preñada me quedo.

Dixo’l sapu, de bon caballeru.

Dixo’l sapu,voi pa Madrí.

Dixo la rana, traime un mandil.

Dixo’l sapu , nun tengo dineiru.

Dixo l rana, téngolu you.

Dixo’l sapu, trailo p’aquí

Dixo la rana, mierda pa ti.

Güei, observamos con pesar que la maxa y les creencies al rodiu d’estos animales va esaniciándose, al empar que merma la so presencia nel nuesu entornu.

1 Respuesta a “Sapos, ranes y sapagueres”

  1. xuga Escribió:

    Ranes sapus y sacaberes, cuantes alcordances de rapacin, guenes y males como cuando, Aurelio, el tapinos, cazionos a Ito, Carlos y a mi, na cerezal, de la llosina, comiendoiles cereces que yeren de danza, que riquines.
    Y amagonos, con frotanos el focicu con un sapu de la reguera, aunde habialus abondu, bien lu sabiamos. Non golvi a goler enxamas aquelles cerecines de danza de la lloxina, el mieu al tapinos frotandonos el sapu en focicu, yera muy grande, el tapinos decia mio pa, yera muy allabascau.

Escribir comentario