Navidá. Amanecer en Belén

admin (24 de diciembre, 2008)

Ye un bon deséu pal nuevu añu 2009, que cada día amaneza en color. Después de contemplar la imaxe tan suxerente d’Alberto del Río, a mí préstame apurrivos esti poema que-y dedico al amanecer en Belén (Valdés) col deséu de que toos tengamos cada día un nuevu amanecer…

Amanez.
Dormez la escuridá nos brazos de la nueite.
Espúrrese l’alba.
Colores intensos pintan la mañana.
Los mious versos pintaos de colores.
Las nubes que bail.lan.
Las flores d’iviernu esparcen
arumes al vientu.
Óyense sones de gaitas, pianos, tambores…

¡Silenciu…!
Ausencias, recuerdos, tristezas…
Palabras.
Palabras escritas no cielu con l.letras de l.luz.

Amanez.
¡Sinto suspiros nel aire!
¡Sinto campanas que cantan poemas!
Colores intensos.
Colores que pintan los versos.
Los mious versos pintaos de colores,
los colores intensos de la mia tierra.
Amanez.
Cantares del alba
Sones de xiplas ya gaitas.
Colores, campanas…

Dende Belén ¡Feliz Navidá!
Avientu de 2008

Categoría: General Comentarios Comentarios (6)

Aculturación

admin (24 de diciembre, 2008)

Ye mui guapo almirar lo distinto de cada llugar y conservalo.

Último día de clas. ¡Vaya xaréu! Pasao’l tragu de les notes, los alumnos dispónense a vivir l’últimu día enantes de les vacaciones con Papá Noel. Sí, con Papá Noel que llega a toles partes, hasta al institutu. Un personax que se popularizó na nuesa dómina, gracies al avión de la publicidá que lu lleva a los requexos más inesperaos. Aculturación, eso ye aculturación a ritmu rápidu. Colo guapo que ye almirar lo distinto de cada llugar… Pero non, nosotros que nun facemos un res por conservar lo nueso, y si podemos ridiculizámoslo, adoptamos costumes que nos vienen de bien lloñe, impuestes pola publicidá y el consumismu. Porque tolo que tenga’l sellu anglosaxón chócanos y dixerímoslo de bon gustu.
Yo que soi bastante despistada, tolos años me pasa lo mesmo por estes feches. Voi pela calle tan tranquila y de repente, alcuéntrome con esi homecón de barbes blanques que se mueve con movimientos torpes na puerta de cualquier establecimientu diciendo tochures pa llamar l’atención. Ye cuando me paro a pensar…¡Pero si yá pasó otru añu! Ye como si’l tiempu m’engañara. ¡Si paez que foi ayeri Navidá y yá tenemos equí otra vez a esti probe! Col trabayu que tendrá na so tierra y empéñense en traelu p’aquí tolos años, polo menos un mes enantes de Navidá. Y quedamos de Papá Noel hasta les narices.
Equí somos asina, tolo que nos vien de fuera ye lo meyor de lo meyor, ¡lo más prestoso! Tenemos a Papá Noel en toles partes; tan pronto lu veo nuna tienda, como pasiándose pela calle embutíu nesi traxe tan feu, como gaviando peles paredes de les cases, xubíu nos árboles o engaramáu nos sitios más peligrosos. Nun quiero pensar qu’un día s’asome a la mio ventana porque, de xuru que pienso que ye una pantasma.
Si seguimos asina, llegaremos a celebrar la Nuechebona toos amazcaritaos de Papá Noel. Esti fenómenu interésa-yos a los grandes almacenes qu’asina vienden regalos a mamplén pa dos feches distintes. Los nenos con tal de que-yos traiga regalos, tán encantaos. Pero la Navidá ye dalgo más que regalos y más regalos. Somos nosotros los que tendríemos que da-y otru sentíu. Dir pasando a los neños el testigu de les nueses tradiciones. A los nuestros llares, hasta hai unos años, siempre llegaron los Reis Magos, asina que nun tris voi escribi-yos una carta, como fixi siempre, pidiéndo-yos dalgún regalín. Tampoco voi pasame. Espero que nun me traigan munchu carbón.

Categoría: General Comentarios Comentarios (3)

“Stop rollos con bombo”

admin (11 de diciembre, 2008)

“Stop rollos con bombo” “Yo lo pongo, yo controlo” “Yo gozo mogollón”, “Yo sólo con condón, sólo con koko”… Con estes nueves y suxerentes lleendes pue ser que la campaña caltrie. Eso dirálo’l tiempu. Entovía tenemos na cabeza la primera campaña condonera, “póntelo, pónselo”, que causó escándalo naquella dómina en dalgunos sectores sociales. Promovida fai casi 20 años, pola entós ministra de sanidá Matilde Fernández, nun tuvo ente la mocedá los efectos deseaos. Siguieron ensin “ponélu”, ensin “poné-ylu”, y paez ser que tuvo hasta l’efeutu contrariu. L’erotismu de la lleenda favorecía inda más el momentu de les rellaciones sexuales y aprovechando’l calentón nun se pue esperar a disponer d’un condón. Daquella encomenzábase una era de cambios sociales que nun sabíemos bien a onde nos diben o nos van llevar. D’otra miente, hai 20 años, la mayoría de los pás, nun tábemos preparaos pa pone-yos el condón nel bolsu a les fíes o fíos, porque procedíemos d’una sociedá hipócrita y represiva onde la sexualidá formaba parte de los tabús familiares.
Pero’l balance de venti años pa esta parte ye desatrosu. Los embaranzos non deseaos n’adolescentes aumentaron en cifres que lleguen a ser alarmantes, y les soluciones que se tomen muncho más alarmantes. Un altu porcentax de la mocedá estrénase sexualmente enantes de los 16 años. Neñes que cuasique comparten los xuegos de la infancia colos xuegos sexuales que-yos traen consecuencies qu’enxamás s’imaxinaron. Enróllense güei y mañana la pareya temporal pasa a les páxines de la biografía amorosa, porque’l 44 % de los adolescentes aseguren tener rellaciones con distintes pareyes y sin nengún tipu de precauciones. A los pocos díes danse cuenta de que’l “rollu” traxo consecuencies non tán prestoses y n’ocasiones preséntase una situación d’embaranzu pero, sobre too, embaranzosa, onde dende esi momentu tán implicaos los pás, anque, en munchos de los casos, non el pá de la criatura porque nun saben quien ye.
¿Qué facer? La esplicación tenémosla nes estadístiques. L’añu pasáu, 4000 nacimientos de neños con madres menores d’edá y 6.273 neñes que determinaron albortar en clíniques privaes, más les que lu fixenon nes públiques. La tasa d’albuertos duplicóse na última década (un 10 % más nel últimu añu). Una de cada tres muyeres qu’albuerta repite y dalguna albuerta hasta seis veces. ¡Espantible!
La nueva campaña surxe coles lleendes ya citaes, muncho más averaes a la xerga xuvenil y a ritmu de “hip hop”. Esti ritmu “mui rítmicu” lo mesmo fai otra vez escaecese del condón. Los resultaos veránse a la vuelta d’unos meses. De toles maneres, anque la publicidá caltrie fondamente ente la mocedá, paezme que llegaos a la situación que llegamos nun basta con campañes publicitaries. Siempre hubo embaranzos non deseaos, albuertos en cisrcunstancies penoses, enfermedaes venérees…Pero güei hai que poner los medios pa que la mocedá algame una formación sólida y conoza’l so cuerpu. Que sepan de les consecuencies que van tener les decisiones que tomen. La sexualidá forma parte de la vida y, la educación, pa que seya integral, tien qu’abordar tolos aspectos del ser humanu y dende distintos ámbitos. Una formación que-yos deprienda a vivir una sexualidá responsable, tanto no que cinca a la tresmisión d’enfermedaes por vía sexual, como pa nun tener que vese ante una situación tán agresiva física y psíquicamente pa la muyer como ye l’albuertu. Ensin meteme en la ética, moral o relixón de caún, nin xulgar a naide, l’albuertu nun se pue considerar una solución. Al rodiu hai tamién un gran negociu. Pero lo más importante ye qu’enxamás una muerte ta xustificada y, a los fetos, dende les cuatro selmanes siéntese-yos llatir el corazón…Hai munchos medios al alcance pa nun tener que llegar a esta situación.

Categoría: General Comentarios Comentarios (6)