esthergarcia (13 de Diciembre, 2009)
Los escesos na cesta la compra de xuru que nos van traer problemes
Esti mes d’avientu ye’l mes de l’abundancia. Magar la crisis qu’atravesamos, nun se notó pa nada nes montoneres de comida que nos supermercaos nos tenten. Turrones de tolos colores y sabores, mazapanes, polvorones, troncos y palos de Navidá, «panteones», y otros dulces exóticos, invítennos a consumir y a facer escesos. Grandes piles de carne, pitos y pites, patos, oques, gochinos, corderinos y demás familia. Nun sé cómo se llibra’l gatu, y el perru, porque con eso de que cada vez comemos más exótico, too pue tener sitiu nestos escaparates pa fartones. Mariscos, llagostes y bugres, amasueles de variaes clases y precios, centollos mutilaos, vexigones a sacaos, salmones, pixines descabezaos, merluces de países llonxanos, más tola variedá de piscifactoría. Xamones pa tolos gustos, chorizu de toa España, salchichones, fiambres de colorinos, patés de tolos sabores, afumaos, y otros manxares, plantéguennos un dilema: qué vamos comer tou esti mes. Nós, pal «por si acasu s’acaba la ufierta» enllenamos los arcones de pescaos y carnes que lo mesmo lleguen hasta la Navidá del añu que vien, conservaos nel fríu del conxelador. Como si d’una época de fame s’avecinare, enllenamos la nevera, la despensa, el trasteru y demás requexos de la casa de manxares navidiegos. Pero llega la hora de pensar nos kilos que nos vamos echar enriba’l cuerpu. Llega la hora de la reflexón. Agora nun se trata sólo de la estética. Agora tenemos otros problemes que nos pue traer la gordura. ¿Y si al gobiernu-y da por tomar cuenta de nós? Porque del tema gordos yá lleva un tiempu ocupándose, hasta llegar a quitar a dalgunos pas la custodia del so fíu porque taba gordu. Pues echémonos a temblar sobre lo que nos puen preparar estos descabezaos, porque too esto del consumismu esaxeráu dalguna consecuencia política va tener. Dalgo se-y ocurrirá al Gobiernu, pa esviar l’atención de tolos problemes serios qu’en realidá tenemos. Igual agora nos toca a les ames o amos de casa, por llevar la cesta la compra empicada de mierdalles navidiegues. Lo mesmo Zapatero toma cuenta de nós pa qu’apretemos el cinturón. Lo que pasa que nun sé a quién va dar la custodia d’esta población alloriada, dirixida pol consumismu y la publicidá. A quién vei dar ZP la custodia de los que faen escesos en Navidá, pero a quién dará la custodia de tolos que tien alredor, que comen y beben ensin tinu y llexislen ensin xeitu. A quién-y va dar la custodia del xuez gordu, del médicu gordu, del psicólogu gordu, del nutricionista gordu y de los gobernantes gordos y fartones que nun se miren l’embligu ¡porque nun pueden!
Ellos sí que necesiten que los ciudadanos-yos quitemos la custodia, el superpoder que fueron algamando sobre nós.
esthergarcia (3 de Diciembre, 2009)
Oveyes nun prau de La Llaguna (Illas)
Oveyes y carneros, protagonistes d’abondes histories n’aldea, güei siguen siendo estampa del campu asturianu.
Hasta casi mediaos del sieglu XX nes cortes asturianes, sobre too pal occidente, había delles cases que compartíen un rebañucu d’oveyes con unes poques vaques. Les oveyes llevábenles al monte, llabor duru pa los pastores, munches veces los neños de la casa, que perdían la escuela pa dir cuidales y soportaben pel iviernu el friu y el temporal. Concretamente, na casa onde yo nací, nel llugar onde taba la cocina, fuera antaño la cuadra les oveyes, qu’entraben pel mesmu pasiellu que les persones. Ellí conservábase un furacu na parede que-y llamábemos el furniel.lu, y que según me cuntaba mio güela, yera’l sitiu onde colocaben l’azogue pa que a les oveyes nun –yos diera “el mal del tiru”.
A mio pá toco-y llevar les oveyes a pastiar. Yera un llabor bien sacrificáu, pues diben tol día pal monte con unes poques pulientes pa comer. Asina, el so pá (mio güelu) quixo desfacese pronto del rebañu pa poder mandar los sos fíos a la escuela y que nun quedaren analfabetos por cuidar oveyes. Too un aciertu, nun hai dulda.
D’unos años a esta parte, tamién vuelven a vese rebañucos d’oveyes paciendo los praos de les cases que yá nun tienen vaques. Pa que nun se vayan a monte meten oveyes, que son mui pacedores y comen tol día ensin tientu. Dexen rasos los praos y asina mantiénenlos llimpios. Y los corderinos rebincan y dan “vida” y allegría a una aldea, que muerre, n’Asturies, poco a poco.
Pero ye’l fíu de la oveya, el corderín, el que presta la so figura y el so nome a distintos seres, siendo protagonista de distintos rituales y socesos. Corderu ye nome de Cristo y un corderu foi’l que sacrificó Abraham por mandáu de Dios en pagu del so fíu. Dende l’antigüedá son munches les cultures que sacrifiquen un corderu pa contentar a los dioses o pa rituales d’otru tipu. Pero tamién el corderu, o’l carneru, ye la figura que’ldiañu escueye pa presentase ante la xente y pa tentala. Cuntábame mio güelu, José de Val.laos, una guapa anéudota que-y sucedió una nueche, cuando yera mozu y diba de filandón. Él yera mui corredor y amigu d’andar de nueche ensin mieu a naide nin a nada. Pero aquella vez, una nueche bien escura, apaecióse-y delantre un forníu carneru que nun lu dexaba pasar, y dixo-y con firmeza:
-¡Monta equí! ¡Monta equí!
Ante la insistencia del animal, él, que yera mui atrevíu y nun pensaba nel peligru, montó enriba d’aquel carneru, que corría como l’aire, y llevólu nun tris al Prau’l Negreiru (Graas) onde hai un picachu que da a un precipiciu. Aquel carneru con complexu de burru, llevólu hasta’l mesmu borde del abismu. Él, que yá tuviera más enganchaes col diañu, tuvo una lluz naquel momentu y ocurrióse-y dicir aquella frase tan eficaz:
-“Arreniego’l diañu”
El carneru desapaeció, quedandaVal.laus coles piernes abiertes ensin burru que cabalgar, como si se tratara d’una ilusión. Nesi momentu taba la so ma rezando ‘l rosariu na cocina la casa. Una costume que se mantuvo en munchos llares hasta que nun llegó la tele. Como siempre, ella pidía pa escorrer el diañu qu’andaba sueltu. Los sos rezares fueron, aquella nueche, la salvación del so fíu. Ella nel momentu nel que’lcarneru cesó del so intentu, tamién tuvo una visión. Un corderu salía pela l.lumera riéndose a cascaraes y diciendo tochures. Siguió rezando hasta que llegó’l so fíu José a casa, alvirtiéndolu una vez más de que’l diañu “nunca duerme”.
Fueron tantes les fechoríes que fixo’l diañu per aquellos llares que tomaron el determín de prendelu na ilesia de Parl.leiru (Vil.layón). Sicasí, nun sé si burllaría la prisión y andará de nuevu caleyando pol mundu, faciendo de les suyes.
Pero inda siendo’l corderu nomatu y figura del diañu, ye animal mui apreciáu en gastronomía y forma parte de les delicies de la bona cocina. Tamién ye pa los llobos la so presa preferida. Cuando yera nena, teníemos una oveya a la que queríemos muncho. Pasó un día un probe pela puerta. Llevaba como mascota una oveyina mui guapa y entendida. El mio hermanu Tino y yo, encaprichémonos d’ella. Mercóla mio pá, cumpliéndonos el gustu y col compromisu de que la cuidaríemos nós. Tuviémosla unos cuantos años como mascota, y nun tardó en danos un corderín guapísimu que medraba como la espuma. Un día que’l mio hermanu los cuidaba nel monte cercanu a la casa, vieno un llobu famientu y arrebató-ylu casique de la so vera. La oveya diose de pates y el mio hermanu tamién, pero quedámonos ensin el corderín. Menos mal que la oveya yera mui rápida, pues teníemosla avezada a echar carreres. Nós, nesi afán d’andar a caballu, y aprovechando lo mansa y resitente que yera, montábemos na probe oveya y echábemos, por rigurosu turnu, una carrera tres d’otra, per aquella carril de la “Güerta L’Aire” que taba un poco alloñada de la nuesa casa. Tan rápido como si fuéremos montaos nun burricu, pero les caíes yeren menos peligroses. Too esto sin que s’enteraren los nuesos pas que víen estrañaos y ensin esplicación, como aquella oveya tenía’l llombu curváu, de tanto soportar pesu. Aquella oveyina dionos unos cuántos corderos.
De la oveyina y los corderos tamién aprovechábemos la llana. Escoyendo un bon día de branu, díbemos con mio güela a bañalos al ríu. Dempués, la oveya secaba al sol y nun tardábemos n’esquilala. D’esti llabor encargábase mio güela. La llana, yera mui apreciada. Daquella, los colchones yeren de llana y había que “facelos” tolos años y añadís un poco d’ello. Apreciaos colchones que pasaron a la historia sustituíos pol de muelles o pol de látex. Too evoluciona. Los de llana hasta mediaos de sieglu yeren un luxu y sustituíen a los de fueya de maíz o a los de borra muncho más incómodos .
El carneru ye otra cosa. En sí ye, como se suel dicir, un “cabrón”. Casi toos son turriones, y si te pillaben yera mui difícil escapar ensin que te mancaren abondo. Yo tampoco me llibré de sufrir les turriaes d’un carneru. Un día, yá hai abondos años, cuando volvía pa la mio casa de la escuela, turrióme un carneru que pacía nun prau a la vera la carretera. En cuanto me vio venir tiróse del talud embaxo y encomenzó a dame turriaes hasta que m’arrequexó na cuneta. Menos mal que lu vieron los dueños y salieron a socorreme. Inda asina tuvi dos díes na cama enllena mancadures.
Anécdotes rellacionaes con estos animales fannos rinos con ganes. Pa otros asuntos fui l’otru día a la Llaguna (Illas), a ver a José María Menéndez y a la vera la casa, zarraes nun prau tenía unes venti oveyes. Encomenzamos a falar de too, allí al solín, sentaos nun bancu y pasé con José María y con Ramón, un ratín de los más prestoso. Cuntáronme delles anéudotes de cuando yeren rapaces. Cuntóme José María con muncha gracia, cómo cuando yera neñu, xuntáronse unos cuantos rapaces de La Llaguna (Corvera) y encomenzaron a azuzar a un carneru que yera d’una cuadra de Castrillón, y que pacía nun prau xunta un horru que pertenez al conceyu d’Illas. Quiciabes el carneru, ante tal llíu de conceyos, taba dalgo allouriáu, ensin saber cuándo pisaba en Illas, o en Castrillón o en Corvera. Dempués de que lu animaron a turriar poniéndo-y una chaqueta per delantre, ellos escaparon y el carneru siguió dando carneiraes contra la puerta de Casa Beno, (esto en Corvera), hasta tirar la puerta. Los neños nun sabíen cómo presentase delantre de Beno, dempués de que’l carneru fixera aquella llacería. Acabaron pagándo-y cinco pesetes caún pa qu’arreglara la puerta casa.
De neciures de carneros podría enllenar munches ringleras. Con razón se suel dicir “ye un carneru” “ye más neciu qu’un carneru”, pa definir a la xente que ye testerona y que nun entra en razón.
Otra anéudota guapa cuéntamela Ramón de La Llaguna (Corvera). A él prestába-y enseñar a los carneros a turriar poniénfdo-yos la mano delantre. Un día xubióse a un mazanal, y dende allí amagába-y a un carneru, L’animal animóse darréu y encomenzó a dar carneiraes al mazanal. Cada vez daba les carneiraes más fuertes y yá taba a puntu de tirar l’arbol, cuando apaeció’l so güelu pa llibralu d’aquel testerón.
En fin, que paez que la oveya ye animal pacíficu y cariñosu, pero’l machu, una vez que miedra hai qu’andase con mil güeyos, tanto si ye un carneru que te pue moler a carneiraes, como si se t’apaez ún de tantos diaños en forma de “carneros”, que son abondo “cabrones”, y puen arruinanos la nuesa vida, y llevándonos al precipiciu.
esthergarcia (27 de Noviembre, 2009)
La bicicleta, mediu de tresporte baratu, saludable y ecolóxicu.
La bicicleta algama protagonismu estos díes al conocese la noticia de que Joaquín Arce, direutor de política Forestal del Principáu, decidiera volver a pedaliar, después de facese con una bicicleta como «vehículu oficial» .Ye esti un tantu más a favor del usu de la bicicleta, mediu de tresporte ecolóxicu, saludable y económicu. Nun dexa de ser una lleición pa toos nós, pero tamién pa la nuestra clase dirixente. Viaxar en bici ye muncho más saludable que dir apoltronaos nos grandes cochazos, munches veces dempués d’una bona fartura. De xuru que pedaliar-yos ayudaría abondo a quemar tantes caloríes inxeríes y, d’otra miente, contribuiría a paliar la crisis que tamos sufriendo.
D’unes décades a esta parte toos nos volvimos dependientes del coche y convertímonos en sufridores d’atascos y lloqueros de tráficu, onde paez que tol mundu se tresforma y quier llegar el primero a tolos llaos.
Yo téngo-y un ciertu aquel a la bicicleta porque foi pa mi, cuando yera nena, un mediu de tresporte, amás d’una diversión. Pero llueu, como la mayoría de la xente, abandoné’l so usu y paséme al coche. Cuando miro p’atrás, dalgo que cuando se llega a cierta edá casique ye inevitable, véome montada naquella bicicleta «de muyer», que mio pá nos compró de segunda mano, pola significativa cantidá de mil pesetes, qu’a principios de la década de los 60, yera un dineral. Dempués de dexar nosotros el llar maternu, la vieya bicicleta siguió utilizándola mio pá. Foi entós bien amortizáu’l so altu preciu. Pero’l tiempu pasa y aquella bicicleta pasó a formar parte de los trastos vieyos que se van amontonando na casería, hasta convertise en chatarra.
Hubo otru momentu pa mi de contactu con esti vehículu de dos ruedes. Foi cuando, repitiéndose la historia, mercámos-yos una bici pa los mios fíos. Un día quixi recordar vieyos tiempos y facer aquel recorríu que con tanta axilidá facía de nena. Pero la cosa nun foi fácil, dime cuenta que nun taba yo en forma como entós y que «cuesta arriba» los pedales daben munchu tiru. Fracasé nel intentu y garré’l coche que yá tenía a la puerta, y que ye una de les tentaciones que nos ufierten los nuevos tiempos.
Nestos últimos años, la contaminación que tamos xenerando col aumentu del parque móvil, fai que nos encomencemos a concienciar sobre los beneficios del usu d’esti vehículu de dos ruedes. Hai que resaltar qu’hai delles villes y ciudaes n’Asturies que yá llevaron a la práutica iniciatives al respeutu. A estes iniciatives sumóse l’Ayuntamientu de Castrillón, que, fai unos meses, cuando se peatonalizó la calle Pablo Iglesias, dexaron un carril pa bicis y, al empar, un aparcamientu con bicis pa usu públicu. Iniciativa qu’aplaudo, pero que yo entovía nun la punxi en práutica.
Nun ye raru ver al conceyal de festeyos de Castrillón dir en bici peles calles de Piedrasblancas, predicando un poco col exemplu, pa ver si nos animamos los vecinos. Too s’andará y a ver si nos vamos mentalizando de que debiéremos «andalo» en bici, en vez de tanto coche.
esthergarcia (12 de Noviembre, 2009)
El pasáu fin de selmana Pravia acoyó un nutríu grupu d’escritores d’Asturies
Pravia foi estos pasaos díes escenariu lliterariu. Allí allugáronse les IX Xornaes de lliteratura que, baxo’l títulu «Interiores. Variaciones pa miranos l’embiligu», organizó con procuru la Asociación de Escritores de Asturias.
En mediu de tanta esmolición social, agravada pola crisis económica y poles otres crisis qu’ello desencadena, nun ta mal evadinos un poco de la realidá, alimentaos pola fantasía que nos ufierta la lliteratura. Como bien defendió Mary Luz Pontón na so brillante ponencia, los escritores navegamos siempre ente la realidá y la ficción y somos quien a movenos nesti mundu ficticiu, que biebe de distintes fontes, ente elles la realidá. Realidá que se tresforma na pluma del escritor en ficción, anque la ficción se dea tamién n’otres estayes del arte. Pero tampoco vamos dicir que los escritores vivimos nuna nube. De xemes en cuando baxamos al mundu real.
La fantasía tamién s’alimentó estos díes nos colexos de Pravia, onde un total de 600 escolinos participaron nel concursu «Las hilanderas». Asistimos a l’actu de la entrega de premios d’estos pequeños escritores que yá prometen garrar el relevu. Norabona a toos.
L’ello ye que nestes xornaes, amás de los momentos lliterarios, vivimos una realidá bien prestosa. Dieciocho escritores fiximos usu de la pallabra con otros tantos temes de lo más variao, a lo qu’hai qu’amestar el broche de los alderiques finales, que siempre son granibles. Y sobre too, foi mui agradable poder convivir y establecer llazos d’amistá nesta villa de Pravia, onde nos afayamos como en casa. D’ello da fe’l bon recibimientu que nos ficieron les instituciones y autoridaes pravianes, encabezaes pol so alcalde, Antonio de Luis; conceyala de Cultura, Valle Iturrete, y Cristina Jerez, bibliotecaria, quien amás de la collaboración na organización de les mesmes, acoyéronnos con mimu y acompañáronnos y tuvieron pendientes en tou momentu pa que nada nos faltara. A toos, gracies.
D’otra miente, como en tou actu que se precie, amás de lliteratura hubo comida. Los bonos sabores de los platos que nos sirvieron nel restaurante Balbona, Patio del Balbona y nel Buen Yantar fixéronnos conxugar perfeutamente la realidá del bon comer cola ficción lliteraria.Volveremos a Pravia, quiciabes a les xornaes de lliteratura, pero de xuru qu’enantes volveremos a saboriar los bonos manxares qu’allí se sirven.
Bien recibíos tamién nos hoteles que nos agospiaron. Quédame dicir que los pravianos son xente amable y servicial. Dau’l despiste que me carauteriza, ayudáronme a buscar el mio coche (nun sabía ónde lu aparcara) poles calles de Pravia. Gracies, amigos.
Ente tanta riqueza cultural, sorprendionos una nota negra. El pasáu vienres dexonos José Antonio Martínez González, pravianu entusiasmáu cola so villa, a quien conocí va unos años cuando m’apurrió abondos documentos de les Escueles de Forcinas pa la mio tesis doctoral. Nel so archivu personal tenía recoyíos documentos y oxetos de munchu valor históricu y cultural. Él conocía perfeutamente los requexos y la historia de la so Pravia natal. A los sos familiares, el mio más sentíu pésame.
esthergarcia (3 de Noviembre, 2009)
Tienen casi el mesmu estatus que na India: son casi “sagraes” y el sustentu la casería.
.La vaca, animal sagráu pa los habitantes de la India ye tamién casi «sagráu» pa los ganaderos asturianos. Ye casique como un miembru más de la familia. Nun la adoramos nel sentíu que tien la palabra adorar, pero sí les queremos y casi las «adoramos», porque fueron y son el principal mediu de sustentu de la casería asturiana.
Hasta bien entráu’l sieglu XX la vaca compartía en munches cases la entrada de la casa colos sos amos, y de la cocina namás la separaba un tabique con un ventana desde’l que se pudiera sentir al ganáu hasta respirar. N’otres cases la corte taba na planta baxa de la vivienda, onde tamién se sentíen tolos sos movimientos. La cercanía d’estos animales, xunío a lo qu’aportaben a la economía familiar, fixo que la rellación ente la xente y les vaques s’estrechara enforma y qu’entrambos s’entendieran. Les vaques, al amu, y los amos, a la vaca, que bien saben cuándo se quexen, cuando tán cansaes, cuando tienen fame o cuando tán fartes.
Ún de los actos que más esmolecíen a los paisanos y paisanes yera’l momentu de parir. Si’l partu se ponía difícil, movilizábase a vecinos y familiares, y asina ayudábase a la vaca a traer al mundu a la cría, que tanta falta-yos facía en casa. Güei sigue prauticándose esta ayuda, anque con más medios; si la cosa se pon mal, llámase al veterinariu p’atender el partu.
Hasta les últimes décades del sieglu XX yera un «entendíu» el que facía les veces de médicu de les vaques. Recuerdo con cariñu a Pacho Bernaldón, que foi l’albeitre de tolos pueblos de La Montaña (Valdés). Él traxo muitos xatos al mundu y fixo otres tantes veces de sanador del ganáu.
Después del partu nun-y faltaben a la vaca los cuidaos d’una «parida», casi como si fuera una muyer: mantega y vinu caliente pa reanimala y pa que s’esgurriara (se salvara) pronto, pan tostao y pulientes pa que se recuperaran del esfuerzu, una bona cama de paya y el cariñu de los amos que l’afalagaben después del esfuerzu. Un bon feixe de yerba seco, que cuidadosamente repartía’l dueñu pa les distintes hores de comer. Farina abondo y a los pocos díes cuando encomenzaba a salir a pacer, bien amantaes con una manta vieya o una chaqueta cubriendo-yos los carriles. Pa ella yera la meyor pación. Al fin y al cabo, taba criando al xatu que mamaba dende’l momentu de nacer y tenía que tar bien alimentada pa que medrara pronto la cría y tuviera «nieta y coleña», como dicíen los paisanos, y pa poder vendela a bon preciu. Yera bien prestosa la escena que siguía al partu. Cuando la vaca llambía al xatín con tantu cariñu y lu dexaba llimpiu y brillante. Un instintu maternal que da gustu contemplar.
Un mal momentu pa la casa yera cuando una vaca albortaba y se perdía la cría, porque llueu yera más difícil qu’agarrara y, a veces, siguía manía por llargu tiempu, colo qu’eso significaba pa la economía familiar, y, sobre too, si teníen que vendela.
Nun me puedo escaecer de los guapos nomes que llevan les vaques nos pueblos: Marquesa, Cierva, Mora, Galana, Gallarda, Pinta, Artillera, Asturiana, Jardinera, Inglesa, Mulata, y otros tantos? Agora, dende que llegó la tele a los pueblos, hasta lleven nomes del mundu de la «farándula».
Antaño les vaques cumplíen na casería tamién la función de vaques de tiru. Xuncíes en pareyes pa tirar del aráu o del carru. Caúna tiraba a la so mano, pero siempre enseñaben a dalguna a tirar de les dos manes por si dalguna enfermaba o taba parida. El xugu, les mullíes, los corniales, etcétera son güei oxetos que descansen nos museos y pasaron a la historia. N’Asturies práuticamente yá nun queden vaques de tiru.
La vaca foi siempre un animal tan apreciáu y tan útil na casería qu’hasta dalgunes novies la llevaben de dote. Había cases mui probes que teníen vaques d’a medies con dalgún ricachón, al que-y llevaben parte del lleche que-y cataben y llueu parte de lo que sacaba’l xatu cuando lu vendíen. Fueron tiempos mui difíciles.
Cuando había que vender una vaca yera motivu de disgustu pa los de casa. Sentíase como si se fuera daquién de la familia. Escena bien recoyida y representada con muncha tenrura nel cuentu «Adiós, Cordera», de Clarín, onde se nos muestra la miseria de l’aldea naquella dómina y rellátanos con detalle la venta de la Cordera y el dolor de Pinín y Rosa al tener que quedase ensin la so vaca. Corderes hubo munches n’aldea asturiana. Por aquel camín de La Estrechina que yá cité n’otros artículos marcharon les dos últimes vaques, la Linda y la Pichona, que cuidaron los mios pas inda después de xubilase, hasta que yá nun podíen atendeles por motivos de salú. El momentu de dexales pa siempre ye bien difícil.
Nun son munchos los que se deciden a siguir col ganáu n’aldea, porque yá nun val aquella economía de subsistencia. Güei pa tener vaques hai que montar una empresa en condiciones y saber llevala con xeitu y con munchu trabayu y esfuerzu, a pesar de la bona maquinaria de la que se dispón.
La tarea de llindar les vaques tocába-yos a los neños y a los güelos. Yera un llabor fácil pero dalgo aburríu, sobre too si había que llindales de la cadena. Tantes hores al pasín qu’elles pacíen, recorriendo les orielles de los praos, los sucos de les tierres y, a veces, les cunetes de la carretera. Entreteníamonos cantando al alto la lleva, asina pasaba primero’l tiempu. Yera un momentu difícil cuando la vaca «moscaba». Siempre había dalguna que tenía’l «sangre más dulce» y cuando llegaba’l branu les mosques acribillábenla. Éstes yeren les que «gradaben» praos y tierres propios y de los vecinos corriendo, col rabu alzáu, ensin haber quien las parare. Podíen hasta despeñase. Yera un peligru. Güei los llendadores fueron sustituíos polos pastores eléctricos, que tantu trabayu aforren a los ganaderos.
Les vaques, como les persones, nun yeren toes de la mesma pasta, dalgunes yeren «amarradices» y había que ponéis una tabla na cabeza pa que nun pudieran dir a buscar guerra coles collacies de pación. Había dalguna que daba pataes cuando se cataba, y había que peala. Tamién les había turriones y corriéronnos más d’una vez. Inda tengo la seña de la Cierva, que yera mui espantona y aplastóme un deu contra’l poste cuando la fui a prender na cuadra dempués de llendala. Mio ma fixo de médica. Entablillóme y encanóme’l deu hasta que curó.
Alredor de la casería siempre rondaben les bruxes y dalgún qu’otru bruxu, non precisamente de los que van enriba la escoba, sinón los que son quien a facer dañu cola mirada, como dicía mio güela. Les vaques podíen llegar a dar sangre en vez de lleche si dalgún-yos echaba’l mal del güeyu, o enllenase de pioyos. O quedase nos güesos, enllenes de llana y tol día col pelo repelón. La cuadra yera un llugar al que nun podíen entrar los sospechosos de causar estes malures. Pero si se colaben o si les embruxaben pel prau, pa ello tamién había rezares y ritos populares. Había qu’espaniales, con un pantalón vieyu que se-yos pasaba penriba’l llombu mientres se recitaba esti rezar: «Si tas embruxáu / desembrúxote you /quiebren los güeyos / de quien t’embruxóu. / Dos güeyos mundanos ya un corazón malu. / Dos güeyos t’agüeyaron / desuéyente tres: / S. Pedro y S. Pablo y el gloriosu San Andrés. / Todo’l mal ayenu. / Todo’l mal pesar / salga d’esta vaca / toda cuanta envidia nella hai». Llueu débanse-y palos al pantalón pa dempués quemalu. Y con él quemábase la bruxería.
Otres lleendes formaron siempre parte de la vida de la vaca. La culiebra acudía al golor de la lleche de vaca parida y mamaba hasta fartase, bien agarrada a los tetos, como si del xatu se tratara. Cuando’l xatín diba a mamar l’ubre yá taba vacíu y en pocos díes el xatu quedábase arruináu y nun olecía. Entós yera’l momentu de vixilar la culiebra pa cuando llegara a la cuadra, matala.
D’otra miente, hai la creencia de que, como otros animales, les vaques sienten la muerte. Cuando pela nueche encomenzaben a bramar, ensin motivu aparente, o se soltaben de la cadena y armaben gran xaréu coles esquiles hasta espertar a los amos, yera seña de que dalgo malo diba pasar ente la familia cercana. Toes estes lleendes van perdiendo puxu nes modernes instalaciones ganaderes. Nelles nun hai llugar pa toes estes falcatrúes.
esthergarcia (3 de Noviembre, 2009)
El poeta cadaveanu dignificó la l.lingua colos sus versos, de gran calidad y fonda preparación.
El pasáu 24 d’ochobre celebramos en Cadavéu, na Casa Natal del Padre Galo, la I Xunta d’escritores, entamada pola Casa la Cultura de L.luarca. La xunta yera abierta a músicos ya outros artistas ya xente almiradora de las nuesas l.letras.
La Casa del Padre Galo restauróuse va unos años por iniciativa del Exmu. Ayuntamientu de Valdés.Ya pa nós un privilexu poder ocupar los distintos espacios d’esa casina guapa, acariñada pol nordés ya asitiada nun l.lugar tan bellu como ya Cadavéu. Sentir al.lí la so presencia que nos afala a siguir p’alantre siguiendo’l camín qu’él un día recorréu con firmeza y que lu soyóu de guapos versos.
El Padre Galo foi un escritor eruditu ya que dignificó la l.lingua colos sous versos. Escribió una poesía de gran calidá en l.lingua asturiana, espeyando nos sous poemas la sua fonda preparación l.lingüística, l.literaria ya cultural.
Nació Galo Antonio Fernández y Fernández-Cantera en Cadavéu el 7 d’agostu de 1884. Cuando tovía yera un nenu, nel 1897 ingresóu nel Conventu noviciáu de la Congregación de María Inmaculada asitiáu n’Urrieta (Guipúzcoa). Viaxa por distintos conventos que tien esta Orde, n’España ya n’Europa, dedicáu a la docencia ya ampliando los sous conocimientos. Especialmente los históricos, arqueolóxicos ya l.lingüísticos, pero siempre chenu de señardá por Asturias. La sua preparación académica ya los continuos viaxes por Europa, permitiéron-y a Galo algamar una cultura sólida, ya una formación esceicional p’aquel.la dómina. Foi un home políglota que dominaba francés, italianu, portugués, inglés, alemán, finlandés. Tamién l.latín, griegu ya hebréu, ya por supuestu la so llingua materna: l’asturianu, la faliel.la como él la nomó, ya outras l.linguas como’l gallegu, catalán, occitanu ya posiblemente dalgo d’euskera. Gran aficionáu a la música sacra, tocaba l’arpa, l’órganu ya’l salteriu. Tamién yera pintor. Podría enllenar fueyas ya fueyas cola sua vida ya la sua obra. Esti espaciu nun me lo permite. Pero, préstame llamar l’atención sobre esti escritor valdesanu, escaecíu hasta fai unas décadas, que tenía la sua obra esparcida por desvanes ya outros requeixos. Amás de la sua poesía en castellán, utiliza’l Padre Galo tamién un llinguax lliterariu pa escribir n’asturianu, más averáu, si se quier, a lo que falaba’l pueblu pero tratáu con tal finura l.literaria que dota asina a la nuesa l.lingua d’una poesía d’altor, ya dignifica cola sua obra las nuesas l.letras.
Asina, foi’l sábadu un día de guapura l.literaria, que lo vivimos con prestancia en Cadavéu los escritores ya outros artistas, bibliotecarios, ya demás asistentes, amás del Alcalde y conceyales de Valdés y autoridaes del Principáu. Enllenaron la xornada duas ponencias bien granibles a cargu de Roberto González-Quevedo y de Xosé Nel Riesgo. Mui interesantes tuvienon las distintas mesas, onde se debatíu sobre «Escribir, Lleer y Editar n’asturianu», respeutivamente. Las conclusiones fairánse públicas en breve, a través de la Casa la Cultura. Pechóse la xornada con un homenaxe a Nené Losada, a cargu d’Esther García y al Padre Galo por Mary Rico, quien nos faló ampliamente sobre la Fiesta de la Regalina, instituida pol poeta cadaveanu.
Nun faltóu la música que retumbó na sala de la casina. Música d’arpa por Dani García de la Cuesta, ex componente del grupu «Lliberdón», ya de las gaitas de la Banda Faro de Luarca. Tamién nos acompañaron cantautores como Rafa Lorenzo ya Carlos Rubiera.
Felicitar a la Casa la Cultura por esta iniciativa ya como nos quedóu bon sabor, taría mui bien que se repitiera pal añu próximu. El l.lugar nun puede ser más afayadizu.
esthergarcia (29 de Octubre, 2009)
Notes pal aniversariu del Centru Educativu de Piedrasblancas
Esti añu celébrase el 25 aniversariu del colexu El Vallín de Piedrasblancas, inauguráu nel cursu 1984-85. Un cuartu de sieglu qu’unes veces paeznos que pasó mui rápido y otres que foi a pasu lentu. Engañifes del tiempu. Según vamos repasando tolos acontecimientos memorables que fueron socediendo a lo llargo d’estos años, hai veces que pararíemos el reló y abellugaríemosnos a disfrutar de los bonos momentos. Quixéremos, per otru llau, escaecer los momentos desagradables, que yá de por sí tienden a escaecese.
Al cumplirse estos 25 años, los que formamos parte de la historia d’esti centru educativu y vemos a aquellos primeros alumnos, ya treintañeros y dalgunos cuasi cuarentones, pas y mas de familia, caemos na cuenta de que realmente’l tiempu pasó. Tengo bien clares les imáxenes del primer día de colexu. Uno de septiembre de 1984, por aquella calle inda ensin asfaltar, diba una riada d’escolinos contentos cola estrena. Ellos yeren l’aniciu d’una escena más que prestosa que se foi sucediendo tolos díes a lo llargo d’estos 25 años.
Por otra parte, les maestres, dalgunes presumiendo con tacones, llegamos con un carráu de barru en cada zapatu. Y darréu apautábemonos yá nes primeres peticiones al Ayuntamientu pa que la calle fuera asfaltada con urxencia. Colos zapatos enllenos de barru pero cola cabeza enllena d’ilusiones y de proyectos, llegamos al centru un grupu de maestros y maestres bastante mozos, mui contentos tamién de estrenar colexu, pero col esmolecimientu que produz entamar de nuevu. Esperábamos la gran tarea que siempre lleva los comienzos. Y aprovechando esti espaciu que me brinda’l periódicu, voi permitime felicitar a Enrique Alonso, el primer director de El Vallín, que tuvo’l méritu de lliderar aquel primer claustru y llevar el pesu de tola organización formando equipu con Pello como secretariu, que tristemente ya nun ta ente nosotros. Eso sí, cola collaboración d’un grupu de profesores que tamién s’implicaron nesta xera organizativa. Un equipu abiertu a toles iniciatives y propuestes d’innovación.
El Vallín algama darréu’l calificativu de colexu innovador. Foi ún de los 10 centros pilotos pa la Enseñanza de la Llingua Asturiana, dalgo que nos permitió llevar el so nome por munchos llugares y tener sonadía en toa Asturies. Fueron munches les xeres entames al rodiu de la clase de Llingua: obres de teatru, periódicu escolar «El Vallín güei», programes en Radio Castrillón, viaxes culturales, participación en concursos lliterarios, festivales en distintos puntos d’Asturies, participación nos llibros d’escolinos editaos pola Academia de la Llingua, onde se recoyía una muestra de los trabayos lliterarios de los alumnos, etc. Daquella, los profesores qu’entamamos a dar clase de Llingua teníemos que fabricar tolos materiales y otres munches estratexes didáutiques. Toes esperiencies inolvidables, tanto pa mi, como maestra, como pa los escolinos, que fueron los protagonistes. Esperiencies novedoses que dieron llugar a la publicación del mio primer llibru de Didáutica.
Pero hubo munches estayes que dieron puxu a esti centru. Viénseme a la memoria la participación del colexu en tantes y tantes xeres deportives, dirixíes pol maestru José Manuel y otros maestros collaboradores, entregaos dafechu a esta actividá extraescolar, de la que salieron dalgunos futbolistas destacaos. Partíos y competiciones que fixeron sonar el nome de El Vallín y que tanto prestaben a los neños.
Viaxes d’estudios, semanes culturales, güertu escolar y tantes otres esperiencies poles que tengo que felicitar los alumnos que las desarrollaron pero sobre too a tolos profesores que las entamaron y que nun puedo nomalos a toos porque en veinticinco años fueron munches les xeres trabayaes.
Tamién foi pioneru El Vallín como colexu d’integración. El maestru Manolo González Orviz, foi’l promotor d’esti esitosu proyeutu y al que llueu se sumaron dellos centros de la comarca y d’Asturies. A Manolo les mios felicitaciones nesti aniversariu. Él tien un llugar especial na historia del colexu.
Y asina El Vallín, siguió la so trayectoria, siempre tan granible, un camín que recorrieron tantes xeneraciones d’alumnos, muncho d’ellos güei con carreres universitaries y profesionales bien cualificaos, al amparo siempre d’un claustru de profesores entregaos al so llabor.
Tolo nuevo xenera allegría y optimismu. El Vallín ye un colexu allegre y lluminosu, la lluz entra pola cúpula de cristal que cubre el teyáu ya illumina l’interior, siempre esquisitamente decoráu pola maestra Pili, enllenu de plantes que los maestros mantienen con munchou mimu y que son fiel espeyu del procuru col qu’allí se trabaya. Y tamién illumina y alimenta la fantasía y los suaños de los escolinos que pasen allí bona parte del día. Nesti espaciu de lluz, tuvo munchos años colgáu un móvil xigante, «la paloma de la paz», enllena de palabres de colores. Un caligrama, poema visual, compuesto nel taller de poesía que desarrollábemos na clas de Llingua Asturiana. Un móvil bien significativu.
Nun me queda namás que felicitar al equipu de profesores que componíamos aquel primer claustro y a tolos que llueu fueron pasando pel centru y que siguieron el camín que nós entamamos. Tolos que pasamos pol colexu, profesores, alumnos, padres, conserxes, personal administrativu y personal de mantenimientu y llimpieza, formamos parte de la so historia, amás de tolos collaboradores y persones que pasaron pel centru en distintes ocasiones y dexaron tamién les sos güelgues. Pa toos felicidaes nesti aniverariu.
Y nun quiero que me falte nestes llinies l’alcordanza pa los alumnos fallecíos nestos 25 años. Momentos tristes que tiñen de negru la historia d’El Vallín. Nin tampoco a los profesores que tamién nos dexaron en plena xuventú y que nos entristecieron cola so partida. Toos ellos, anque nun tean ente nós tamién tán na nuesa memoria.
esthergarcia (15 de Octubre, 2009)
Torre de la Iglesia de Belén
Enxame nel campanariu de Belén
Dizse popularmente que «nun hai campana ensin bruxa», y pue ser que seya verdá. Por eso dacuando falla’l toque de campanes o’l campaneru, ensin esplicación. El campanariu siempre foi y ye un llugar especial nes ilesies, y si se quier un poco priváu. A él xube’l campaneru y dacuando’l cura y’l sacristán y dellos páxaros que faen ellí no altu’l so ñeru. Amás de los grandes y vistosos ñeros de les cigüeñes, que nos sorprienden cuando cruzamos les llanures de Castiella, tamién s’abelluguen nel campanariu les curuxes y los esperteyos y ocasionalmente les abeyes. Nel campanariu de Belén (Valdés) hai un enxame d’abeyes que se ficieron ocupes d’aquel llugar. Mirador dende onde divisen un guapu paisax, dende los montes hasta la mar, ensin que naide les moleste y ellí tarán fabricando ricu miel. Habrá que buscar a dalgún curiosu pa esmelgar les abeyes del campanariu, que de xuru va ser más difícil que tocar les campanes.
Na procesión de la fiesta de Belén esti añu nun sonaron les campanes, nun sabemos si pola mor de les bruxes o pola presencia de les abeyes. Pero’l día Belenín otru campaneru xubió a tocar a gloria mientres salía la procesión. El, amás de conocer bien l’arte de tocar les campanes, ye gran conocedor de les abeyes, porque tien un bon cortín, y taba entós preparáu por si-yos diera a éstes por engafase y tuviera qu’improvisar y ponese a garrar l’enxame.
Tol mundu conoz el llinguax de les campanes, pero non tol mundu sabe tocales, arte que nun ye nada fácil. Nos pueblos siempre hai dalgún campaneru o campanera que les toquen con arte y saben qué toques tienen que facer según la circunstancia. Ye necesario pasar el testigu a dalgún mozu pa que nunca s’escaeza’l llinguax de la campana, tan útil n’otros tiempos pa comunicase ente los vecinos ya inclusive p’alloñar tormentes, dalgo qu’en Belén paez que nun tien efeutu, pues los rayos cayeron na torre en más d’una ocasión y llegaron a causar grandes desperfeutos.
Ye importante que les campanes nun dexen de repicar. Bien ye verdá qu’agora cuando hai fueu llamamos al 112, y yá nos solucionen el problema, y pa llamar a conceyu utilizamos el teléfonu. Tamos perbién comunicaos.
Sin embargu, magar la decadencia d’usu pola mor de la revolución teunolóxica, la campana ye inseparable del pueblu, forma parte entovía de dellos ritos relixosos, llora polos muertos y allégranos el corazón cuando toca a fiesta. La campana sigue teniendo un aquel especial ente los vecinos.
La historia y delles curiosidaes sobre les campanes podríen enllenar munches llinies, pero como l’espaciu nun me lo permite, les campanes volverán a ser tema d’otru próximu artículu.
esthergarcia (15 de Octubre, 2009)
N’aldea casique nun hai nenguna casa que nun tenga perru y a veces dos o tres.
El perru ye un de los animales «de casa». Dizse que’l perru ye’l meyor amigu del home y pienso qu’esta afirmación ye cierta. N’aldea,casique nun hai nenguna casa que nun tenga perru y a veces dos o tres. Agora tamién hai munchos nes ciudaes y comparten pisu colos sos dueños. Na mio casa siempre hubo perru y, de xuru que por eso, yo tengo por esti animal un aquel especial.
Casique nun m’alcuerdo de les coses desagradables que me pasaron cuando yera nena, porque les persones tendemos a escaecer los malos momentos y amás bien ye verdá que recuerdo la infancia como una época feliz, quiciabes, pol aquello de que «cualquier tiempu pasáu foi meyor». Pero sí m’alcuerdo nidiamente d’un socesu triste, que me marcó y nun se m’escaeció enxamás.
Aquel día mio pá erguióse bien ceo, como facía davezo cuando diba a L.luarca, pa poder dexar too despacháu, apareyar el burru, y llegar ceo abondo pa facer tolos enredos que llevaba entremanos. A la villa nun se diba tolos díes y había qu’aprovechar el viaxe. Aquel día cuando yá amanecía y diba marchar, dio nel mio cuartu, con cara triste y díxome con reparu.
-Nena, «Kilo» morrió.
Yo lloré y lloré pol mio perrín, pero yá nun había remediu. Nun supiemos nunca la causa, porque «Kilo» gozaba de bona salú. Mio pá dicía que como andaba a perres fuera del pueblu y hasta bien lloñe, que dalgún desalmáu y diera dalgo que lu mató.
Creo que foi la mio primer esperiencia cola realidá de la muerte. Por eso, y polo que quería al perru, quedóme aquello grabáu na memoria. Aquí taría bien xustificada la frase «¡esti perru mundu!» o «morrer como un perru!»… El probe «Kilo», de xuru qu’aquella nueche, pasó una «nueche de perros»…
Pero nun acabó equí la cosa. Yo yera una neña bien pequeña, y con aquel socesu dolorosu tamién deprendí lo que significaba una esquela. Mio pá enterró a «Kilo» na finca nomada «La Bouza» y al día siguiente apaeció allí una esquela con un epitafiu que nun nos prestó nada. Esto inda nos fixo apenanos más. Dende llueu naquel momentu de duelu por «Kilo», les bromes de mal gustu sobraben. Pero los humanos somos asina de morbosos y nun somos quien a ponenos nel llugar de los demás.
Tamién ye verdá que la perda d’un perru n’aldea nun yera tán sentida como la d’otru animal de la casa, pues a otru perru llegábase fácil, pero eso nun quitaba’l dolor que, de xuru, lu amenorgaría la casi inmediata llegada del siguiente guardián.
Dende aquel socesu, munches veces sentí que-ys pasara lo mesmo a otra xente, aquello de «envenenaron-ys el perru», «mataron-ys el perru», «diéron-y una paliza al perru…». Porque yera con frecuencia’l probe perru motivu de vengances d’otru tipu o por otros motivos, por exemplu como-y pasó a «Kilo», por andar escalustrando onde nun debía, por andar a perres molestando polos corrales. «Kilo» rcorría kilómetros, hasta onde’l golor de les ferormones perrunes lu llevaben pa satisfacer el deséu sexual. Nun tardamos en tener otru perru. Varios perros pasaron pola mio casa dende la mio neñez.
D’otra miente, l’amigu del home nun ye siempre correspondío nel amor y fidelidá que-y profesa al so amu. Munches veces son los propios dueños, los que son quien a desfacese del perru cuando se cansan de tener que cuidalu.
Cuando los perros muerren de muerte natural, paez que se recibe con más resignación. Pero hubo más en casa que tuvieron mal final. A «Ney» comiéronlu los llobos una nueche d’iviernu,cuando baxaben del monte esfamiaos a la gueta d’alimentu. Otru disgustu grande pa mi y pal mio hermanu Tino. Los dos llorábemos a llárima viva ante la impotencia de la proximidá de les fieres.
De caún d’ellos guardo dalguna anéudota. A «Tros» regalómelu Celesto, un tíu míu que vivía en Ruturbiu siendo yo estudiante n’Uviéu. Col humor de mocedá, tráxilu nuna caxa, dende Mieres a Uviéu nel tren, con mieu a qu’encomenzara a lladrar. Durmió una nueche na residencia d’estudiantes onde yo paraba, tamién mediu a escondíes, pa que la direutora nun s’enterara del «nuevu residente». Y llueu de viaxe nel Alsa, hasta L.luarca y na camioneta de Lías hasta Belén.
El casu ye que’l probe perru, nun sé si de tanto viaxe, llegó a casa y encomenzó a da-y un mal que nun lu dexó hasta que morrió dempués d’unos cuántos años. Caía redondu y rodaba a vueltes por aquellos praos abaxo, que, por cierto, son abondo cuestos, y cuando volvía en sí subía galdíu hasta la vera casa. Nun fuimos quien a curalu.
A «Tul» recuérdolu porque yera un pillu. Gustáben-y muncho los güevos crudos, y diba a buscalos al nieiru, en cualquier descuidu de los de casa. Víamoslu pasar camín arriba col güevu na boca a escondese pa comelu a gustu. Si percibía que lu tábemos mirando, posaba’l güevu con cuidadín nel camín y siguía como si la cosa nun fuera con él.
De xuru, que pensando en volver a buscalu n’otru momentu, cuando naide lu viera. Nunca se-y quitó a «Tul» la zuna de robar los güevos y eso tráxo-y al animal dalgún qu’otru disgustu, fuera del llar. Yera tan cariñosu que-y perdonábemos davezu toes estes travesures.
Los perros tán siempre sollertes sobre lo que socede al so alredor y hasta munchos kilómetros de distancia. Saben antes que nós cuando hai cambios de tiempu y tienen un olfatu tán finu qu’olfatian el cariñu y l’estáu d’ánimu de los sos amos. Pero la creencia popular diznos que sienten tamién la muerte. Nun escaezo’l mieu y la congoxa que sentíamos cuando un perru aullaba sin parar, con un aullíu doliosu. Siempre nos dicíen que «a daquién sentía blandu». La esmolición que nos causaba’l pensar quién diba morrer, teníanos en vilu por unos díes.
Son munchos los escritores que-y dedicaron escritos y pomes al perru. Y cuéntome ente ellos. Nel mio llibru «Historias de vida ya señes de muerte», incluyo ún de los mios rellatos preferíos , «Triste Navidá», rellatu dedicáu a los perros y a los vieyos. Nesti escritu espéyase la tristura que produz l’ abandono y la soledá. Escaezse la xente que’l perru nun ye un xuguete, sinón un ser vivu, que necesita atención, cuidaos y cariñu. Fáense con un perru ensin pensar la dedicación que requier. Al pocu tiempu, cuando pasa la novedá de los primeros díes, cuando’l «xuguete» yá los cansa, déxanlo abandonáu, la mayor parte les veces en circunstancies penoses.
Espeya mui bien esta situación l’escritor Antonio Gala, nun testu tituláu «Monólogu d’un perro», que ye estremecedor, onde denuncia con muncha sensibilidá esti triste abandonu d’animales.
Y nun pueo falar nesti espaciu de tolos perros que m’acompañaron dende neña. Pero nun quiero escaecer l’alcordanza de los dos últimos. «Luki», que foi l’últimu perru de los mios pas, y qu’acabó pasando los últimos años con nosotros. Adautóse mui bien a la vida de la ciudá y a les prohibiciones, con muncha menos llibertá que tenía nel pueblu. Por él cayéronme munches llárimes el día que nos dexó. Nun sé si inda más que por «Kilo», más consciente agora de la feúra de la muerte.
Y «Pepa», la mio perrina querida, que pasó tantes hores xunto a mi, arrullada pol tin-tin de les tecles del ordenador. «Pepa» yera una «border collie», guapísima, obediente, cariñosa, ya intelixente, que nos allegraba la vida cola so vitalidá y allegría, pero, sobre too, col cariñu que nos demostraba en tou momentu. Xuguetona, entendida, futbolista y que taba pendiente de tolos movimientos na casa. Hasta yera quien a compartir l’estáu d’ánimu de caún de nós.
Nun se pue volver p’atrás, pero «Pepa» foi una de les coses que tuvi que mereció la pena y que repetiría poder compartir con ella la mio vida y los mios sentimientos. Pero tamién nos dexó va un añu. Tuvi munches veces pa dedicá-y un escrito y nunca pudi. Les llárimes emborronaben el papel cada vez que me ponía a pensar en «Pepa».
«Kilo», «Ney», «Tros», «Tul», «Prisler», ente otros, «Luki» y «Pepa». Toos ellos tienen un furaquín nel mio corazón.
esthergarcia (1 de Octubre, 2009)
Cuando falo de Belén estráñase la xente, porque inda hai munchos asturianos que desconocen la esistencia d’esti guapu l.lugar asitiáu nel conceyu de Valdés. El nome de Belén, según el doctor Xósé Lluis García Arias, autor del l.libru Toponimia asturiana, el porqué de los nomes de los nuestros pueblos, “podría tener un supuestu orixe antiguu rellacionable col cultu a Beleno, dios veneráu ente los celtes. O tamién podría xustificase como nome de persona d’un antiguu posesor de la tierra” Atendiendo al so significáu bíblicu, Belén vien de Bet-lehem, que significa “Casa del pan”.
Belén ya la cabecera de la parroquia de La Montaña-San Salvador de Ríu Negru. Asitiáu a 17 Km de L.luarca, pola carretera que l.lieva a Villayón, ye l.lugar que merez la pena conocer pol so encantu natural. El patrón de la parroquia ya San Salvador, y la patrona ye la Virxe de Belén, virxe que tien munchos devotos que la visitan non sólo‘l día la fiesta, sinón outras muitas veces a lo l.largo l’añu. La Fiesta celébrase’l primer domingu d’ochobre (esti añu’l próximu día cuatro). Y a ésta siempre acude muita xente de los conceyos vecinos, pa disfrutar d’una prestosu día festivu con comida nel campu. Eso sí, como nos volvimos un poco comodones, en vez de sentase nel prau, pue reservase mesa. Estas fiestes de Belén ya Belenín, zarran el ciclu festivu del branu nel Conceyu de Valdés. Namás nos fai falta qu’el tiempu se porte bien ya que’l Nuberu dormeza ya nun nos mande agua pa esi día
Esti l.lugar nun ta señaláu como l.lugar de pasu del Camín de Santiago, pero la so historia, la so maxa ya la so situación, dícennos que pudo ser un ramal del Camín. Hasta Belén chegan caminos que parten del Conceyu de Tinéu ya pasan pol picu L’Estoupu ou por Capiel.lamartín. ya dende Belén hai caminos que cruzan las sierras, con tramos onde quedan restos d’una calzada empedrada, ya l.liévannos a distintos puntos del conceyu de Villayón ya de Navia, ente el.los a San Salavador de Piñera ya a San Salvador de Loza. Ya mui probable que podamos documentar una posible ruta del Camín de Santiago que pasaría por Belén de La Montaña. .
Pero güei lo que me presta, sobre too, ya falar d’esta Fiesta que la xente de La Montaña espera con ilusión ya qu’ inda conserva l’aquel d’una fiesta de pueblu. Años atrás, encomenzaban una selmana antes los preparativos pa recibir a los invitaos que venían “de sopas”, tradición que se sigue manteniendo. Güei colas comodidaes qu’hai nas casas, nun fai falta encomenzar con tanta antelación. Eso sí, los organizadores de la fiesta, l.lievan unos cuantos días estresaos, col envís de que too salga bien. Esposiciones de fotos, artesanía, conciertu, misa cantada, sesión vermouth, ente outros actos, preséntannos una xornada festiva que se nos ofrez bien prestosa. Bail.le tarde ya nueite pa favorecer la dixestión. Tampoco faltará la pólvora, nin el repicar de las campanas na procesión. Ya remataremos con una gran verbena’l sábadu, día 10, día de Belenín. Esperámosvos.
www.belendevaldes.es
« Entradas Anteriores Entradas Siguientes »
Comentarios (2)
