esthergarcia (5 de Febrero, 2010)
Hai que chegar a un equilibriu de personal nel mundu l.laboral
Güei, el que tien un puestu de trabayu ta ciertamente contentu, porque cuesta muito chegar a facese con un emplegu. El trabayu, según Hoyt, produz satisfaición ya permite a quien lu realiza sentise arguyosu ya realizáu. Sin embargu, n’España, son muitas las personas que nun tán desempeñando’l trabayu que-ys gustaría ou pal que tán meyor preparaos. Esto produz insatisfaición ya pienso que nun se rinde lo mesmo nun puestu pal que tas preparáu ya te sientes a gustu que nun emplegu al que t’agarras porque tienes que sobrevivir. Asina tán las cousas. Ya cada vez tán agravándose más estos desarreglos l.laborales, sobre too, pa los más mozos. Por si esto fuera pouco, vamos camín de perder, en parte, l’Estáu de bienestar que fuimos algamando después de muitos años de lluchar por el.lo.
Son muitos los mensaxes negativos que nos chegan estos días sobre’l futuru de la Seguridá Social ya preocúpanos abondo’l perder aquel.lo que teníemos ganao. Ye sabío que nos últimos tiempos aumentó la esperanza de vida, ya quiciabes aumentará más nas próximas décadas, pero nun debiera esto ser pretestu pa chegar a aumentar la edá de xubilación. Al que trabaya trenta y cinco ou cuarenta años, yá-y tocóu cotizar pa sostener a los pensionistas, a los paraos ya a los coleutivos más desfavorecíos. Bien ta que chegue un momentu, qu’entovía en condiciones de disfrutar dalgo de la vida, tenga la merecida xubilación. Nun se pue mantener el mundu l.laboral namás que con vieyos, magar el sou l.labor ya la sua esperiencia seyan mui valoratibles. Hai que tener un ciertu equilibriu no que cinca al personal.
En vez «enredar» cola Seguridá Social, el Gobiernu debiera preocupase de crear emplegu dignu ya de calidá. El paru espérase que nesti añu supere el 20%, los maratonianos horarios de los trabayadores, que pue dicise que «viven» na empresa, los sueldos polos suelos. Iguar la vida l.laboral cola vida familiar, ya outros muitos problemas qu’afeutan al mundu del trabayu.
D’outra miente, n’España yá tenemos un sistema de xubilación flexible que permite, por un l.lau, en del.las profesiones la posibilidá de permanecer nel mercáu l.laboral dempués de los 65 años, con dalguna bonificación na postrera pensión. Ya, per outru l.lau, permite xubilaciones anticipadas en dalgunos sectores. Midida, ésta, que casi siempre favorez a las empresas. Amortizan el puestu, ou nel meyor de los casos, desfanse asina del personal que nun-ys ya rentable polos drechos algamaos, ya porque asina contratan a mocedá en condiciones muito más favoratibles pa la empresa.
Sóbrannos especuladores ya necesitamos empresarios.
Mientras, la propia alministración ta xubilando de forma obligatoria a profesionales de dixebraos sectores, en profesiones nos que ya mui valoratible la esperiencia profesional. Son too incongruencias de dalgunos políticos que nos tán l.levando al caos.
esthergarcia (21 de Enero, 2010)
Al santu protector de los animales amontónase-y el trabayu
Escribo estes llinies el día de San Antón, patrón del ganáu, una fiesta especial na que los ganaderos récen-y al Santu polos animales que-yos dan el pan. Anque nun ye l’únicu día que San Antón recibe llimosnes y ufriendes, porque la xente del campu siempre foi devota d’esti santu, y yera a quien-y pidíen favores cuando un res sufría malures o se perdía pel monte. Nestos momentos difíciles, amás de les visites y les llimosnes que se-y ofrecíen, rezábase la oración a San Antonio qu’inda se sigue rezando cuando se pierde dalgo importante. El so usu xeneralizóse y dizse en situaciones nes que paez que’l sumiciu t’escuende les coses. Si se tropieza hai poques posibilidaes d’alcontrar el ganáu o l’oxetu perdíu, pero si se diz too de siguío ensin confundise, ye bona señal. Y paez ser que nun falla. A mi deprendiómela mio güela. L’espaciu nun me permite reproducila equí pero los interesaos en recuperar oxetos perdíos podéis consultar el mio blog: http://blogs.lne.es/esthergarcia/
San Antón, patrón de los animales, ye tamién amigu de les moces. Ye a quién se-y reza (más bien se-y rezaba) pa que dientro l’añu la moza atopare un galán que la llevare a los altares. Nun sé si San Antón tará un poco desencantáu o tará sufriendo una crisis no tocante a los sos poderes, porque güei, pa buscar mozu, pienso que lo que menos fai la mocedá ye rezar. Hai otres armes poderoses pa «lligar» que se dieron les moces n’usar, ensin nengún tipu de prexuicios y nun ven la necesidá de la intervención del dantu. D’otra miente, eso de dir hasta los altares ta en decadencia, y más van a los altares como quien va de romería y nun paez sinón qu’esa bendición nun tien l’efeutu deseáu, pues anque son munches les pareyes que pasen pela ilesia, a dalgunes nun hai San Antón que les salve.
San Antón más bien tendrá que centrase nel cuidáu de los animales. Tal como se tán poniendo les coses, pola mor de la crisis, tendrá qu’atender los problemes del ganáu y los de los ganaderos, que tán esmolíos pola situación qu’atraviesa’l negociu. A ver si cola intervención del santu los escuchen les autoridaes competentes.
D’otra miente tien que protexer a les mascotes poles que-y piden con fervor los sos amos. Les que más abunden son los perros y los gatos, pero les mascotes son de lo más variao. Tiénense en casa animales de lo más exóticu: furones, tortugues, páxaros, culiebres, camaleones, cacatúes, loros etcétera. La cantidá d’animales que conviven colos humanos danos fe de la necesidá de cariñu y compañía que tenemos. Inda sabiendo que tener un animal en casa nos esixe munchos cuidaos y trabayu, ta demostráu que ye dalgo que tien munches compensaciones, y quien tien la suerte de poder disfrutar de la so compañía disfruta de munchos momentos de felicidá.
Asina que San Antón los guarde a toos.
SI BUSCAS MILAGROS MIRA/ MUERTE Y ERROR DESTERRADOS,/ MISERIA Y DEMONIO HUIDOS,/ LEPROSOS Y ENFERMOS SANOS./ EL MAR SOSIEGA SU IRA/ REDIMENSE ENCARCELADOS,/ MIEMBROS Y BIENES PERDIDOS/ RECOBRAN MOZOS Y ANCIANOS/ EL PELIGRO SE RETIRA,/ LOS POBRES VAN REMEDIADOS./ CUENTENLO LOS SOCORRIDOS/ DIGANLO LOS PADUANOS./ GLORIA AL PADRE, GLORIA AL HIJO/ GLORIA AL ESPIRITU SANTO./ GLORIA A CRISTO POR NOSOTROS/ ANTONIO GLORIOSO Y SANTO./ PARA QUE DIGNOS ASI / DE SUS PROMESAS SEAMOS./ AMEN.
esthergarcia (7 de Enero, 2010)
Nun sé si los Magos d’Oriente s’aturullarán coles nueves formes de comunicación.
Cuando esti artículu salga a la lluz, toos sabremos si los Magos recibieron la nuesa carta y nos dexaron dalgo na zapatiella. Seique nun serán quien los Reis a lleer tolos tipos de cartes que-yos llegaríen, vía corréu y vía internet. Entovía vi peles xugueteríes cartes en papel y buzones per dalgunos requexos, pero quiciabes munchos escoyeren esti añu’l corréu electrónicu o les redes sociales pa comunicase colos Reis Magos y pa facer públicos los sos pidíos. Maxínome a los Reis, toos azotaos, caleyando per internet, y mirando los encargos nel Facebook, Twitter, Linkedin o n’otros llugares virtuales. Maxínome que, colo vieyos que son, tendrán problemes p’adautase a esta nueva sociedá virtual que naz n’internet y medra a velocidaes inimaxinables.
El momentu d’escribir a los Reis siempre ye dalgo qu’enllena d’ilusión a los neños. Los Reis, magar la crisis que nos afeuta, llegarán cargaos de mandangues. Los neños de la nuesa dómina nun saben qué paquetes abrir de los munchos que-yos dexen, y los pas tendrán abondo con lleer los llibros d’instrucciones de los sofisticaos artiluxos. Namás fai falta ver cómo taben les «tiendones» estos díes. ¡Pa echar a correr! Y foi lo que fixi. Fuxir d’aquel lloqueru, reprochándome’l determín de dir buscar un xuguete que, como Reina Maga, me pidíen nuna cartina enllena garabatos. Les coles pa pagar tomaben tol pasiellu. El calor atontaba al más resistente. Los carros nun podíen con más. Ye verdá que yá voi de mala gana; nun me gusta muncho dir a estes «grandes superficies» de les que tamos mui bien sirvíos n’Asturies. Nun me gusta, como dixi, caleyar por estos llugares nos que, col despiste que me carauteriza, llegué a perdeme, a perder el coche y otres munches anéudotes que me pasaron cuando, mui de ralo en ralo, se m’ocurre dir visitalos.Tolos años faigo’l propósitu de que nun voi volver a pisar nestos lloqueros per estes feches, pero quiciabes envuelta, como otros munchos, nesti montaxe navidiegu que nos empeñamos n’alimentar, vime, de sópitu, metida nuna caravanona de coches guiaos por xoferes histéricos pa llegar rápido al destín. Yo, que tolos años protesto, volví sufrir esti espectáculu alloriante.
Sicasí, dientro unes hores, tamién taré sollerte a ver si hai dalgo na mio zapatiella. Yo, anque me gusten les nueves teunoloxíes, escribí la carta de puñu y lletra. Una carta bien cariñosa pa camelar a los Reis, y como fui bona, de xuru que me dexarán un regalín y nun me dexarán carbón. Pero sobre too pído-yos ilusión.
Pa vosotros, espero que vos dexen dalgún regalu. Y pído-yos que vos traigan salú ya ilusión pa disfrutar de los llargos díes d’esti añu qu’acaba d’encomenzar.
esthergarcia (29 de Diciembre, 2009)
Les campanes son dalgo inseparable del pueblu y tienen un ciertu poder de misteriu. Nunca meyor época pa escribir sobre les campanes que la Navidá. Casique nun habrá naide que nun conoza o tararie nestes feches el popular y allegre villancicu «Campanes de Belén», que deprendimos de pequeños.
La campana ye ún de los símbolos de la Navidá. El toque de les campanes da-y solemnidá a momentos señalaos. Pero la campana ye un de los elementos sonoros que va poco a poco enmudeciendo. Foi perdiendo protagonismu colos cambios que socedieron nos pueblos y ciudaes nes últimes décades, sobre too, cola llegada de les nueves teunoloxíes. Sicasí, les campanes siguen mirándonos dende les altures y conserven el sen máxicu que siempre tuvieron. Anque agora seya más de ralo en ralo, el toque de campanes espierta sensaciones más o menos prestoses, según el momentu pal que se toquen.
La campana yá s’utilizaba en tiempos de los faraones, pero foi munchos sieglos más tarde cuando s’estendió por tol mundu, a lo que contribuyó sobre manera l’espardimientu del cristianismu. Nes ilesies y catedrales ye onde podemos atopar campanes de tolos tipos y tamaños.
N’Asturies tenemos guapos campanarios y campanes mui antigües. Según un estudiu fechu pol valencianu Frances Llop, la campana de la catedral d’Uviéu ye la más antigua de les esistentes n’España. Esta campana nomada Wamba foi construida nel añu 1219. Pero tenemos otres campanes singulares. Pol so tamañu, la principal ye «La Gorda» de Toledo, que pesa «namás» que cuatro tonelaes y tien casi tres metros de diámetru. Viénseme a la meoria el guapu cantar popular que m’enseñó, cuantayá, la mio maestra Gloria Fidalgo y que cantábemos pa xugar al corru: «Para campana grande / la de Toledo / que caben siete sastres / y un zapateru?». La más grande del mundu ye la de Kremlin de Moscú, que pesa 202 tonelaes, anque ta fendida yá dende la so fabricación.
Sicasí la campana da pa muncho. Les campanes son dalgo inseparable del pueblu y tienen un ciertu poder de misteriu. Yá dende l’antigüedá hai la creencia de que’l soníu tien efeutu sobre la materia. El «ruíu» pue influir sobre la Naturaleza y sobre ciertos fenómenos naturales que nella se producen. El toque de campanes, amás de sirvir pa danos información de mises, muertes, fiestes y fueu, ente otres coses, sirve pa facer fuxir la tronada. En munches cultures de dixebraos llugares del mundu, y tamién n’Asturies, recúrrese al toque de campanes pa escorrer los truenos. Y entovía fai pocos díes, cuando se celebró la Conferencia sobre Cambiu Climáticu en Copenhague, (Dinamarca) l’asociación humanitaria católica Caritas Internacional y el Consejo Mundial de Iglesias ficieron un llamáu a tolos los cristianos del mundu, pa que les campanes de los sos templos tañeren, como esixencia de «xusticia climática». Guapa manifestación a favor del nuestru Planeta.
Ante la desesperación de tolos peligros que nos amaguen, entovía somos quien a recurrir nestos tiempos a la sabiduría popular. Y la campana conserva pa nós tol so poder máxicu.
esthergarcia (17 de Diciembre, 2009)
Delles notes sobre les pites y el gallu na casería asturiana.
Dispóngome a escribir esti artículu sobre les pites y lo primero que se me vien a la memoria ye aquel dilema de si foi primero la pita o’l güevu. Pero pensando nes pites viénenseme a la memoria otres munches coses. Como yá s’acerca la hora la cena, toi naguando por un güevu estrelláu con chorizu y pataques, que tanto me gusta. Ye esti ún de los sabores que tengo bien grabaos na memoria del gustu. Pero nun ye sólo esti manxar el que nos proporcionen les pites. Tola variedá de tortielles encomenzando pola tortía de pataca, la francesa, de xamón, d’oricios, de xampiñones, de bonitu y de tolo que se nos ocurra. Platu socorríu y riquísimu. Otru platu que ta perbonu ye l’arroz guisao con pita que se fai n’aldea cuando la pita yá ta vieya y nun pon güevos. Agora, dende hai unos años, ufiertase en dalgunos restaurantes como dalgo especial. Eso sí, estos de xuru que guisen pita nueva, más bien de granxa. Pero nun-yos vamos a quitar el méritu.
Tampoco puedo escaecer, nesti repasu culinariu, el caldu de pita, que ta tan rico y ye hasta melecinal. Enantes cuando paría una muyer, lo primero que se facía yera matar una pita que yá taba destinada pa esi momentu, pa facer un caldín a la parida y pa que fuera garrando fuerces y porque ye bono pa too, pa «salvase», pa dar lleche y, sobre too, pa calentar el cuerpu dempués d’un esfuerzu tan grande. Nos años d’escasez solíen dicir «qu’una pita daba pa munchos caldos», porque la cocíen unes cuantes veces, mientres daba sabor. Cuando yá se-y sacara tola sustancia, entós yera cuando se comía la carne, yá un poco desaboría, pero nun yéremos tan repunantes como agora. Tamién ye verdá qu’en casa la parida solía aumentar el gallineru, porque los familiares y xente allegao, cola «visita», ente otros manxares pa la parida (pan blanco, chocolate, una botella de vinu Sansón, galletes, güevos, etcétera) solíen lleva-y una pita. Polo menos pa que tuvieren pa dir matando una cada pocos díes, hasta que la muyer se recupera de la cuarentena. Esti caldín de pita nun yera esclusivu pa les muyeres paríes. Cuando daquién se ponía malu na casa procurábase da-y caldín de pita, qu’ayudaba a recuperase. Otra parte melecinal son les untaces, utilizaes pa curar malures de garganta, poniéndoles bien calentines a mou de cataplasma.
Nun yera pa los nenos bon momentu’l ver matar una pita. Tamién tengo na memoria’l golor tan fuerte que desprienden les plumes al echá-y a la pita agua ferviendo pa pelala. Pero, sobre too, ye una muerte mui cruel eso de cortá-y el pescuezu, hai que valir pa ello.
Tengo nidio na memoria el tar mirando atentamente cómo abríen la pita pa llimpiala. Siempre mirábemos los güevinos que tenía dientro, toos de distintos tamaños, mui mariellos, porque yeren sólo yema, ensin cascu y recubiertos con una telina mui fina. Yá taba l’agua al fueu pa cocelos y prestábennos un montón.
Los güevos son de gran alimentu y por eso yeren tan apreciaos na casería. L’ama la casa yera la que controlaba’l ñeru. Dende «mirar les pites» a ver si lu teníen (metiéndo-yos el deu en culu) hasta dir tolos díes al ñeru, varies veces, pa recoyelos. Dalgunes pites yeren zuniegues y comíen el so propiu güevu namás ponelu, y había que controlales. Tamién ye frecuente que-y gustaren al perru que taba sollerte pa cuando cantaba la pita. Entós, en cuanto se sentía una pita cantar, allá diba l’ama corriendo pa que’l güevu nun corriera peligru.
Pero inda muncho más prestoso qu’esta escena ye’l ver una pita con pitinos. Cuando toos añeren debaxo les sos ales y ella los cuida con tantu procuru y con tantu mimu, enseñándolos a buscar pa comer y a escarbar na tierra. Sacando’l bocáu de la boca pa los sos fíos como una bona madre. Lo malo ye cuando venía’l taforru y se llevantaba con un pitín y llueu volvía a por otru y a por otru. Inda me paez tar oyendo a mio ma escorrelu a voces, pero pocu casu y facía. Como diera cola niada había que dase por perdíu. Acababa con toos.
Agora en poques cases echen les pites a pitos. Ye difícil contemplar esta tierna escena. Otra de les coses que cuasimente desapaeció del paisaxe de l’aldea. Cuando tienen que reponer el piteru, porque son vieyes, van mercales a les granxes, que ya-yos les dan medio criaes y preparaes pa poner güevos. Pites ponedores, pitos d’engorde y too a la carta. Roxes, blanques, negres, y pa tolos gustos. Pienso que si les encargamos podemos tener hasta una pita verde. Pitinos verdes y roxos yá los vi nel mercáu.
L’echar la pita a pitos yera too un ritual y había que saber cómo llevalu hasta’l final. Lo primero había qu’esperar a que se punxeren chueces pa echales a pitos. Xuntar una docena polo menos de güevos bien frescos y gallaos pues sinón nun valíen. Nun díbamos a dexar el gallu ensin función nel gallineru, ¡el gallu la quintana! Había que buscá-y a la pita un llugar afayadizu pa pone-y el ñeru, normalmente, nuna cesta con yerba seca y en llugar escuru. Mio güela materna, Amadora, que tenía les pites en muncha estima, echaba la pita a pitos nel desván de la casa. Dependiendo onde tuviera gorando, había que sacar la pita a comer y a beber y vixilar que naide tocara los güevos, porque sinón anóxalos y nun los gora. Ella ye la que los revuelve y los coloca pa que’l calor-yos llegue a toos y salgan a los 21 díes los pitinos. Momentu espectacular que tuvi la suerte de contemplar munches veces. Nun se sabe por qué dalgunos güevos llegaben a pudrise. Echáben-y la culpa a la pita. «Pudriólos», solía dicise. Si na casa nun chociaba nenguna, pidíase prestada a un familiar o a un vecín y volvíase cuando acababa de criar los pitos, cuando los dexaba «volar solos pol mundu». Tamién yera corriente pidir los güevos si nun los había en casa.
Amás del taforru, otru enemigu de les pites ye la raposa, que nun tien nin un plizcu vergüenza y anda tol día caleyando de casa en casa a ver cuándo pue entrar nel gallineru. A veces tien matao toles pites nuna nueche. Esta matanza coleutiva tamién podía ser cosa de la denunciel.la que les mata pa chúpa-yos el sangre. Asina, hai que tar al tanto de que se recueyan toes pa la caseta a dormir y si pue ser ceo meyor. Les pites enxamás esperen a qu’escureza. Por eso se solía dicir a les moces, si se descuidaben na hora de volver pa casa del baille o de les fiestes, «hai que recoyese con día, como les pites». Güei nun tien efeutu esta comparanza. Les moces recuéyense cola lluz del día pero la lluz del amanecer. ¡Cómo cambien los tiempos!
Otros dichos abondo machistes avérennos al comportamientu d’estos animales: «Ye más puta que les pites», sin embargu, l’home «ye un gallu», ya inclusive pa nomar a daquién con cariñu, llámase-y «gallu». Sí, el gallu ye ún gran machista, nun hai dulda. Namás fai falta velu andar enchipáu pel gallineru tres de les pites, qu’acaben «agachándose» ensin poner demasiaos reparos. Sinón, el gallu, magar tener pa él tou un gallineru, acaba esplumándoles a picotazos. A dalguna nun-y dexa olecer. Son toes d’él y trailes al retorteru y satisfái a gustu les sos necesidaes sexuales.
Los gallos saben de la so superioridá y nun se sabe si por celos, si por mieu a que-y quiten les pites, dalguno ye bravu y tírase a la xente, amás con abonda mala idea. Si t’engancha ye difícil llibrase de los picotazos.
Pero hai que dicir que’l gallu tamién tienen la so parte cariñosa. Tien un aquel especial sentir cantar el gallu peles mañanes. Nun tien nada que ver col espertador de siempre, nin col dixital, nin col más sofisticáu de tolos espertadores. Espertar col cantu’l gallu nel silenciu del campu ye otra cosa. Na casa onde nací, magar agora nun hai ganadería fueron quedando ellí unes cuántes pites, bien atendíes por un amigu de la casa, Pepe Lin. Yo pienso que más que nada ye por llegar allí y poder saboriar los güevos de casa con chorizu, a los que yá fixi antes alusión. Les pites de mio casa son más bien un caprichu. Entre estes poques pites tuviemos un gallu que namás qu’oyía’l coche llegar, encomenzaba a cantar al altu la lleva. Cantaba’l gallu d’allegría como si tuviéremos una estrecha rellación afeutiva y notábase-y el so contentu cuando llegábemos a ocupar aquel espaciu solitariu. Una emotiva escena, como quien reclama compañía humana. La soledá nun-y gusta a naide. Asina, el gallu aquel fíxose vieyu nel gallineru, porque naide quería matalu pa echalu na pota. Teníamos-y un cariñu especial.
Güei, en tolos restaurantes que se precien ufierten na carta «pitu de caleya», nun van poner «pitu de casa» porque sería una engañifa. Pero los que tenemos na memoria’l sabor d’aquellos «pitos de casa», guisadinos con arbeyos, nun somos quien a alcontrá-y el gustu a esos pitones de los supermercaos, anque lleven la denominación «de caleya». Menos mal qu’inda hai dalguna casa pelos pueblos que los alimenten y los críen como antaño, y de xemes en cuando tócanos un pitu d’aquellos que ye un verdaderu manxar. Ye muncho d’agradecer.
Pites y gallos de granxa, pitones, gal.lones, güevos de tolos tamaños, arriquecíos con vitamines y mierdalles, ocupen güei los escaparates de les tiendes. Y al empar vei borrándose la escena de les pites pel prau, del vecín escorriendo les pites del otru que tolo escarben, de la pita colos pitinos debaxo les sos ales. Cada vez más estes estampes fanse borroses n’aldea asturiana. Esi ye’l preciu que pagamos pola modernización.
esthergarcia (13 de Diciembre, 2009)
Los escesos na cesta la compra de xuru que nos van traer problemes
Esti mes d’avientu ye’l mes de l’abundancia. Magar la crisis qu’atravesamos, nun se notó pa nada nes montoneres de comida que nos supermercaos nos tenten. Turrones de tolos colores y sabores, mazapanes, polvorones, troncos y palos de Navidá, «panteones», y otros dulces exóticos, invítennos a consumir y a facer escesos. Grandes piles de carne, pitos y pites, patos, oques, gochinos, corderinos y demás familia. Nun sé cómo se llibra’l gatu, y el perru, porque con eso de que cada vez comemos más exótico, too pue tener sitiu nestos escaparates pa fartones. Mariscos, llagostes y bugres, amasueles de variaes clases y precios, centollos mutilaos, vexigones a sacaos, salmones, pixines descabezaos, merluces de países llonxanos, más tola variedá de piscifactoría. Xamones pa tolos gustos, chorizu de toa España, salchichones, fiambres de colorinos, patés de tolos sabores, afumaos, y otros manxares, plantéguennos un dilema: qué vamos comer tou esti mes. Nós, pal «por si acasu s’acaba la ufierta» enllenamos los arcones de pescaos y carnes que lo mesmo lleguen hasta la Navidá del añu que vien, conservaos nel fríu del conxelador. Como si d’una época de fame s’avecinare, enllenamos la nevera, la despensa, el trasteru y demás requexos de la casa de manxares navidiegos. Pero llega la hora de pensar nos kilos que nos vamos echar enriba’l cuerpu. Llega la hora de la reflexón. Agora nun se trata sólo de la estética. Agora tenemos otros problemes que nos pue traer la gordura. ¿Y si al gobiernu-y da por tomar cuenta de nós? Porque del tema gordos yá lleva un tiempu ocupándose, hasta llegar a quitar a dalgunos pas la custodia del so fíu porque taba gordu. Pues echémonos a temblar sobre lo que nos puen preparar estos descabezaos, porque too esto del consumismu esaxeráu dalguna consecuencia política va tener. Dalgo se-y ocurrirá al Gobiernu, pa esviar l’atención de tolos problemes serios qu’en realidá tenemos. Igual agora nos toca a les ames o amos de casa, por llevar la cesta la compra empicada de mierdalles navidiegues. Lo mesmo Zapatero toma cuenta de nós pa qu’apretemos el cinturón. Lo que pasa que nun sé a quién va dar la custodia d’esta población alloriada, dirixida pol consumismu y la publicidá. A quién vei dar ZP la custodia de los que faen escesos en Navidá, pero a quién dará la custodia de tolos que tien alredor, que comen y beben ensin tinu y llexislen ensin xeitu. A quién-y va dar la custodia del xuez gordu, del médicu gordu, del psicólogu gordu, del nutricionista gordu y de los gobernantes gordos y fartones que nun se miren l’embligu ¡porque nun pueden!
Ellos sí que necesiten que los ciudadanos-yos quitemos la custodia, el superpoder que fueron algamando sobre nós.
esthergarcia (3 de Diciembre, 2009)
Oveyes nun prau de La Llaguna (Illas)
Oveyes y carneros, protagonistes d’abondes histories n’aldea, güei siguen siendo estampa del campu asturianu.
Hasta casi mediaos del sieglu XX nes cortes asturianes, sobre too pal occidente, había delles cases que compartíen un rebañucu d’oveyes con unes poques vaques. Les oveyes llevábenles al monte, llabor duru pa los pastores, munches veces los neños de la casa, que perdían la escuela pa dir cuidales y soportaben pel iviernu el friu y el temporal. Concretamente, na casa onde yo nací, nel llugar onde taba la cocina, fuera antaño la cuadra les oveyes, qu’entraben pel mesmu pasiellu que les persones. Ellí conservábase un furacu na parede que-y llamábemos el furniel.lu, y que según me cuntaba mio güela, yera’l sitiu onde colocaben l’azogue pa que a les oveyes nun –yos diera “el mal del tiru”.
A mio pá toco-y llevar les oveyes a pastiar. Yera un llabor bien sacrificáu, pues diben tol día pal monte con unes poques pulientes pa comer. Asina, el so pá (mio güelu) quixo desfacese pronto del rebañu pa poder mandar los sos fíos a la escuela y que nun quedaren analfabetos por cuidar oveyes. Too un aciertu, nun hai dulda.
D’unos años a esta parte, tamién vuelven a vese rebañucos d’oveyes paciendo los praos de les cases que yá nun tienen vaques. Pa que nun se vayan a monte meten oveyes, que son mui pacedores y comen tol día ensin tientu. Dexen rasos los praos y asina mantiénenlos llimpios. Y los corderinos rebincan y dan “vida” y allegría a una aldea, que muerre, n’Asturies, poco a poco.
Pero ye’l fíu de la oveya, el corderín, el que presta la so figura y el so nome a distintos seres, siendo protagonista de distintos rituales y socesos. Corderu ye nome de Cristo y un corderu foi’l que sacrificó Abraham por mandáu de Dios en pagu del so fíu. Dende l’antigüedá son munches les cultures que sacrifiquen un corderu pa contentar a los dioses o pa rituales d’otru tipu. Pero tamién el corderu, o’l carneru, ye la figura que’ldiañu escueye pa presentase ante la xente y pa tentala. Cuntábame mio güelu, José de Val.laos, una guapa anéudota que-y sucedió una nueche, cuando yera mozu y diba de filandón. Él yera mui corredor y amigu d’andar de nueche ensin mieu a naide nin a nada. Pero aquella vez, una nueche bien escura, apaecióse-y delantre un forníu carneru que nun lu dexaba pasar, y dixo-y con firmeza:
-¡Monta equí! ¡Monta equí!
Ante la insistencia del animal, él, que yera mui atrevíu y nun pensaba nel peligru, montó enriba d’aquel carneru, que corría como l’aire, y llevólu nun tris al Prau’l Negreiru (Graas) onde hai un picachu que da a un precipiciu. Aquel carneru con complexu de burru, llevólu hasta’l mesmu borde del abismu. Él, que yá tuviera más enganchaes col diañu, tuvo una lluz naquel momentu y ocurrióse-y dicir aquella frase tan eficaz:
-“Arreniego’l diañu”
El carneru desapaeció, quedandaVal.laus coles piernes abiertes ensin burru que cabalgar, como si se tratara d’una ilusión. Nesi momentu taba la so ma rezando ‘l rosariu na cocina la casa. Una costume que se mantuvo en munchos llares hasta que nun llegó la tele. Como siempre, ella pidía pa escorrer el diañu qu’andaba sueltu. Los sos rezares fueron, aquella nueche, la salvación del so fíu. Ella nel momentu nel que’lcarneru cesó del so intentu, tamién tuvo una visión. Un corderu salía pela l.lumera riéndose a cascaraes y diciendo tochures. Siguió rezando hasta que llegó’l so fíu José a casa, alvirtiéndolu una vez más de que’l diañu “nunca duerme”.
Fueron tantes les fechoríes que fixo’l diañu per aquellos llares que tomaron el determín de prendelu na ilesia de Parl.leiru (Vil.layón). Sicasí, nun sé si burllaría la prisión y andará de nuevu caleyando pol mundu, faciendo de les suyes.
Pero inda siendo’l corderu nomatu y figura del diañu, ye animal mui apreciáu en gastronomía y forma parte de les delicies de la bona cocina. Tamién ye pa los llobos la so presa preferida. Cuando yera nena, teníemos una oveya a la que queríemos muncho. Pasó un día un probe pela puerta. Llevaba como mascota una oveyina mui guapa y entendida. El mio hermanu Tino y yo, encaprichémonos d’ella. Mercóla mio pá, cumpliéndonos el gustu y col compromisu de que la cuidaríemos nós. Tuviémosla unos cuantos años como mascota, y nun tardó en danos un corderín guapísimu que medraba como la espuma. Un día que’l mio hermanu los cuidaba nel monte cercanu a la casa, vieno un llobu famientu y arrebató-ylu casique de la so vera. La oveya diose de pates y el mio hermanu tamién, pero quedámonos ensin el corderín. Menos mal que la oveya yera mui rápida, pues teníemosla avezada a echar carreres. Nós, nesi afán d’andar a caballu, y aprovechando lo mansa y resitente que yera, montábemos na probe oveya y echábemos, por rigurosu turnu, una carrera tres d’otra, per aquella carril de la “Güerta L’Aire” que taba un poco alloñada de la nuesa casa. Tan rápido como si fuéremos montaos nun burricu, pero les caíes yeren menos peligroses. Too esto sin que s’enteraren los nuesos pas que víen estrañaos y ensin esplicación, como aquella oveya tenía’l llombu curváu, de tanto soportar pesu. Aquella oveyina dionos unos cuántos corderos.
De la oveyina y los corderos tamién aprovechábemos la llana. Escoyendo un bon día de branu, díbemos con mio güela a bañalos al ríu. Dempués, la oveya secaba al sol y nun tardábemos n’esquilala. D’esti llabor encargábase mio güela. La llana, yera mui apreciada. Daquella, los colchones yeren de llana y había que “facelos” tolos años y añadís un poco d’ello. Apreciaos colchones que pasaron a la historia sustituíos pol de muelles o pol de látex. Too evoluciona. Los de llana hasta mediaos de sieglu yeren un luxu y sustituíen a los de fueya de maíz o a los de borra muncho más incómodos .
El carneru ye otra cosa. En sí ye, como se suel dicir, un “cabrón”. Casi toos son turriones, y si te pillaben yera mui difícil escapar ensin que te mancaren abondo. Yo tampoco me llibré de sufrir les turriaes d’un carneru. Un día, yá hai abondos años, cuando volvía pa la mio casa de la escuela, turrióme un carneru que pacía nun prau a la vera la carretera. En cuanto me vio venir tiróse del talud embaxo y encomenzó a dame turriaes hasta que m’arrequexó na cuneta. Menos mal que lu vieron los dueños y salieron a socorreme. Inda asina tuvi dos díes na cama enllena mancadures.
Anécdotes rellacionaes con estos animales fannos rinos con ganes. Pa otros asuntos fui l’otru día a la Llaguna (Illas), a ver a José María Menéndez y a la vera la casa, zarraes nun prau tenía unes venti oveyes. Encomenzamos a falar de too, allí al solín, sentaos nun bancu y pasé con José María y con Ramón, un ratín de los más prestoso. Cuntáronme delles anéudotes de cuando yeren rapaces. Cuntóme José María con muncha gracia, cómo cuando yera neñu, xuntáronse unos cuantos rapaces de La Llaguna (Corvera) y encomenzaron a azuzar a un carneru que yera d’una cuadra de Castrillón, y que pacía nun prau xunta un horru que pertenez al conceyu d’Illas. Quiciabes el carneru, ante tal llíu de conceyos, taba dalgo allouriáu, ensin saber cuándo pisaba en Illas, o en Castrillón o en Corvera. Dempués de que lu animaron a turriar poniéndo-y una chaqueta per delantre, ellos escaparon y el carneru siguió dando carneiraes contra la puerta de Casa Beno, (esto en Corvera), hasta tirar la puerta. Los neños nun sabíen cómo presentase delantre de Beno, dempués de que’l carneru fixera aquella llacería. Acabaron pagándo-y cinco pesetes caún pa qu’arreglara la puerta casa.
De neciures de carneros podría enllenar munches ringleras. Con razón se suel dicir “ye un carneru” “ye más neciu qu’un carneru”, pa definir a la xente que ye testerona y que nun entra en razón.
Otra anéudota guapa cuéntamela Ramón de La Llaguna (Corvera). A él prestába-y enseñar a los carneros a turriar poniénfdo-yos la mano delantre. Un día xubióse a un mazanal, y dende allí amagába-y a un carneru, L’animal animóse darréu y encomenzó a dar carneiraes al mazanal. Cada vez daba les carneiraes más fuertes y yá taba a puntu de tirar l’arbol, cuando apaeció’l so güelu pa llibralu d’aquel testerón.
En fin, que paez que la oveya ye animal pacíficu y cariñosu, pero’l machu, una vez que miedra hai qu’andase con mil güeyos, tanto si ye un carneru que te pue moler a carneiraes, como si se t’apaez ún de tantos diaños en forma de “carneros”, que son abondo “cabrones”, y puen arruinanos la nuesa vida, y llevándonos al precipiciu.
esthergarcia (27 de Noviembre, 2009)
La bicicleta, mediu de tresporte baratu, saludable y ecolóxicu.
La bicicleta algama protagonismu estos díes al conocese la noticia de que Joaquín Arce, direutor de política Forestal del Principáu, decidiera volver a pedaliar, después de facese con una bicicleta como «vehículu oficial» .Ye esti un tantu más a favor del usu de la bicicleta, mediu de tresporte ecolóxicu, saludable y económicu. Nun dexa de ser una lleición pa toos nós, pero tamién pa la nuestra clase dirixente. Viaxar en bici ye muncho más saludable que dir apoltronaos nos grandes cochazos, munches veces dempués d’una bona fartura. De xuru que pedaliar-yos ayudaría abondo a quemar tantes caloríes inxeríes y, d’otra miente, contribuiría a paliar la crisis que tamos sufriendo.
D’unes décades a esta parte toos nos volvimos dependientes del coche y convertímonos en sufridores d’atascos y lloqueros de tráficu, onde paez que tol mundu se tresforma y quier llegar el primero a tolos llaos.
Yo téngo-y un ciertu aquel a la bicicleta porque foi pa mi, cuando yera nena, un mediu de tresporte, amás d’una diversión. Pero llueu, como la mayoría de la xente, abandoné’l so usu y paséme al coche. Cuando miro p’atrás, dalgo que cuando se llega a cierta edá casique ye inevitable, véome montada naquella bicicleta «de muyer», que mio pá nos compró de segunda mano, pola significativa cantidá de mil pesetes, qu’a principios de la década de los 60, yera un dineral. Dempués de dexar nosotros el llar maternu, la vieya bicicleta siguió utilizándola mio pá. Foi entós bien amortizáu’l so altu preciu. Pero’l tiempu pasa y aquella bicicleta pasó a formar parte de los trastos vieyos que se van amontonando na casería, hasta convertise en chatarra.
Hubo otru momentu pa mi de contactu con esti vehículu de dos ruedes. Foi cuando, repitiéndose la historia, mercámos-yos una bici pa los mios fíos. Un día quixi recordar vieyos tiempos y facer aquel recorríu que con tanta axilidá facía de nena. Pero la cosa nun foi fácil, dime cuenta que nun taba yo en forma como entós y que «cuesta arriba» los pedales daben munchu tiru. Fracasé nel intentu y garré’l coche que yá tenía a la puerta, y que ye una de les tentaciones que nos ufierten los nuevos tiempos.
Nestos últimos años, la contaminación que tamos xenerando col aumentu del parque móvil, fai que nos encomencemos a concienciar sobre los beneficios del usu d’esti vehículu de dos ruedes. Hai que resaltar qu’hai delles villes y ciudaes n’Asturies que yá llevaron a la práutica iniciatives al respeutu. A estes iniciatives sumóse l’Ayuntamientu de Castrillón, que, fai unos meses, cuando se peatonalizó la calle Pablo Iglesias, dexaron un carril pa bicis y, al empar, un aparcamientu con bicis pa usu públicu. Iniciativa qu’aplaudo, pero que yo entovía nun la punxi en práutica.
Nun ye raru ver al conceyal de festeyos de Castrillón dir en bici peles calles de Piedrasblancas, predicando un poco col exemplu, pa ver si nos animamos los vecinos. Too s’andará y a ver si nos vamos mentalizando de que debiéremos «andalo» en bici, en vez de tanto coche.
esthergarcia (12 de Noviembre, 2009)
El pasáu fin de selmana Pravia acoyó un nutríu grupu d’escritores d’Asturies
Pravia foi estos pasaos díes escenariu lliterariu. Allí allugáronse les IX Xornaes de lliteratura que, baxo’l títulu «Interiores. Variaciones pa miranos l’embiligu», organizó con procuru la Asociación de Escritores de Asturias.
En mediu de tanta esmolición social, agravada pola crisis económica y poles otres crisis qu’ello desencadena, nun ta mal evadinos un poco de la realidá, alimentaos pola fantasía que nos ufierta la lliteratura. Como bien defendió Mary Luz Pontón na so brillante ponencia, los escritores navegamos siempre ente la realidá y la ficción y somos quien a movenos nesti mundu ficticiu, que biebe de distintes fontes, ente elles la realidá. Realidá que se tresforma na pluma del escritor en ficción, anque la ficción se dea tamién n’otres estayes del arte. Pero tampoco vamos dicir que los escritores vivimos nuna nube. De xemes en cuando baxamos al mundu real.
La fantasía tamién s’alimentó estos díes nos colexos de Pravia, onde un total de 600 escolinos participaron nel concursu «Las hilanderas». Asistimos a l’actu de la entrega de premios d’estos pequeños escritores que yá prometen garrar el relevu. Norabona a toos.
L’ello ye que nestes xornaes, amás de los momentos lliterarios, vivimos una realidá bien prestosa. Dieciocho escritores fiximos usu de la pallabra con otros tantos temes de lo más variao, a lo qu’hai qu’amestar el broche de los alderiques finales, que siempre son granibles. Y sobre too, foi mui agradable poder convivir y establecer llazos d’amistá nesta villa de Pravia, onde nos afayamos como en casa. D’ello da fe’l bon recibimientu que nos ficieron les instituciones y autoridaes pravianes, encabezaes pol so alcalde, Antonio de Luis; conceyala de Cultura, Valle Iturrete, y Cristina Jerez, bibliotecaria, quien amás de la collaboración na organización de les mesmes, acoyéronnos con mimu y acompañáronnos y tuvieron pendientes en tou momentu pa que nada nos faltara. A toos, gracies.
D’otra miente, como en tou actu que se precie, amás de lliteratura hubo comida. Los bonos sabores de los platos que nos sirvieron nel restaurante Balbona, Patio del Balbona y nel Buen Yantar fixéronnos conxugar perfeutamente la realidá del bon comer cola ficción lliteraria.Volveremos a Pravia, quiciabes a les xornaes de lliteratura, pero de xuru qu’enantes volveremos a saboriar los bonos manxares qu’allí se sirven.
Bien recibíos tamién nos hoteles que nos agospiaron. Quédame dicir que los pravianos son xente amable y servicial. Dau’l despiste que me carauteriza, ayudáronme a buscar el mio coche (nun sabía ónde lu aparcara) poles calles de Pravia. Gracies, amigos.
Ente tanta riqueza cultural, sorprendionos una nota negra. El pasáu vienres dexonos José Antonio Martínez González, pravianu entusiasmáu cola so villa, a quien conocí va unos años cuando m’apurrió abondos documentos de les Escueles de Forcinas pa la mio tesis doctoral. Nel so archivu personal tenía recoyíos documentos y oxetos de munchu valor históricu y cultural. Él conocía perfeutamente los requexos y la historia de la so Pravia natal. A los sos familiares, el mio más sentíu pésame.
esthergarcia (3 de Noviembre, 2009)
Tienen casi el mesmu estatus que na India: son casi “sagraes” y el sustentu la casería.
.La vaca, animal sagráu pa los habitantes de la India ye tamién casi «sagráu» pa los ganaderos asturianos. Ye casique como un miembru más de la familia. Nun la adoramos nel sentíu que tien la palabra adorar, pero sí les queremos y casi las «adoramos», porque fueron y son el principal mediu de sustentu de la casería asturiana.
Hasta bien entráu’l sieglu XX la vaca compartía en munches cases la entrada de la casa colos sos amos, y de la cocina namás la separaba un tabique con un ventana desde’l que se pudiera sentir al ganáu hasta respirar. N’otres cases la corte taba na planta baxa de la vivienda, onde tamién se sentíen tolos sos movimientos. La cercanía d’estos animales, xunío a lo qu’aportaben a la economía familiar, fixo que la rellación ente la xente y les vaques s’estrechara enforma y qu’entrambos s’entendieran. Les vaques, al amu, y los amos, a la vaca, que bien saben cuándo se quexen, cuando tán cansaes, cuando tienen fame o cuando tán fartes.
Ún de los actos que más esmolecíen a los paisanos y paisanes yera’l momentu de parir. Si’l partu se ponía difícil, movilizábase a vecinos y familiares, y asina ayudábase a la vaca a traer al mundu a la cría, que tanta falta-yos facía en casa. Güei sigue prauticándose esta ayuda, anque con más medios; si la cosa se pon mal, llámase al veterinariu p’atender el partu.
Hasta les últimes décades del sieglu XX yera un «entendíu» el que facía les veces de médicu de les vaques. Recuerdo con cariñu a Pacho Bernaldón, que foi l’albeitre de tolos pueblos de La Montaña (Valdés). Él traxo muitos xatos al mundu y fixo otres tantes veces de sanador del ganáu.
Después del partu nun-y faltaben a la vaca los cuidaos d’una «parida», casi como si fuera una muyer: mantega y vinu caliente pa reanimala y pa que s’esgurriara (se salvara) pronto, pan tostao y pulientes pa que se recuperaran del esfuerzu, una bona cama de paya y el cariñu de los amos que l’afalagaben después del esfuerzu. Un bon feixe de yerba seco, que cuidadosamente repartía’l dueñu pa les distintes hores de comer. Farina abondo y a los pocos díes cuando encomenzaba a salir a pacer, bien amantaes con una manta vieya o una chaqueta cubriendo-yos los carriles. Pa ella yera la meyor pación. Al fin y al cabo, taba criando al xatu que mamaba dende’l momentu de nacer y tenía que tar bien alimentada pa que medrara pronto la cría y tuviera «nieta y coleña», como dicíen los paisanos, y pa poder vendela a bon preciu. Yera bien prestosa la escena que siguía al partu. Cuando la vaca llambía al xatín con tantu cariñu y lu dexaba llimpiu y brillante. Un instintu maternal que da gustu contemplar.
Un mal momentu pa la casa yera cuando una vaca albortaba y se perdía la cría, porque llueu yera más difícil qu’agarrara y, a veces, siguía manía por llargu tiempu, colo qu’eso significaba pa la economía familiar, y, sobre too, si teníen que vendela.
Nun me puedo escaecer de los guapos nomes que llevan les vaques nos pueblos: Marquesa, Cierva, Mora, Galana, Gallarda, Pinta, Artillera, Asturiana, Jardinera, Inglesa, Mulata, y otros tantos? Agora, dende que llegó la tele a los pueblos, hasta lleven nomes del mundu de la «farándula».
Antaño les vaques cumplíen na casería tamién la función de vaques de tiru. Xuncíes en pareyes pa tirar del aráu o del carru. Caúna tiraba a la so mano, pero siempre enseñaben a dalguna a tirar de les dos manes por si dalguna enfermaba o taba parida. El xugu, les mullíes, los corniales, etcétera son güei oxetos que descansen nos museos y pasaron a la historia. N’Asturies práuticamente yá nun queden vaques de tiru.
La vaca foi siempre un animal tan apreciáu y tan útil na casería qu’hasta dalgunes novies la llevaben de dote. Había cases mui probes que teníen vaques d’a medies con dalgún ricachón, al que-y llevaben parte del lleche que-y cataben y llueu parte de lo que sacaba’l xatu cuando lu vendíen. Fueron tiempos mui difíciles.
Cuando había que vender una vaca yera motivu de disgustu pa los de casa. Sentíase como si se fuera daquién de la familia. Escena bien recoyida y representada con muncha tenrura nel cuentu «Adiós, Cordera», de Clarín, onde se nos muestra la miseria de l’aldea naquella dómina y rellátanos con detalle la venta de la Cordera y el dolor de Pinín y Rosa al tener que quedase ensin la so vaca. Corderes hubo munches n’aldea asturiana. Por aquel camín de La Estrechina que yá cité n’otros artículos marcharon les dos últimes vaques, la Linda y la Pichona, que cuidaron los mios pas inda después de xubilase, hasta que yá nun podíen atendeles por motivos de salú. El momentu de dexales pa siempre ye bien difícil.
Nun son munchos los que se deciden a siguir col ganáu n’aldea, porque yá nun val aquella economía de subsistencia. Güei pa tener vaques hai que montar una empresa en condiciones y saber llevala con xeitu y con munchu trabayu y esfuerzu, a pesar de la bona maquinaria de la que se dispón.
La tarea de llindar les vaques tocába-yos a los neños y a los güelos. Yera un llabor fácil pero dalgo aburríu, sobre too si había que llindales de la cadena. Tantes hores al pasín qu’elles pacíen, recorriendo les orielles de los praos, los sucos de les tierres y, a veces, les cunetes de la carretera. Entreteníamonos cantando al alto la lleva, asina pasaba primero’l tiempu. Yera un momentu difícil cuando la vaca «moscaba». Siempre había dalguna que tenía’l «sangre más dulce» y cuando llegaba’l branu les mosques acribillábenla. Éstes yeren les que «gradaben» praos y tierres propios y de los vecinos corriendo, col rabu alzáu, ensin haber quien las parare. Podíen hasta despeñase. Yera un peligru. Güei los llendadores fueron sustituíos polos pastores eléctricos, que tantu trabayu aforren a los ganaderos.
Les vaques, como les persones, nun yeren toes de la mesma pasta, dalgunes yeren «amarradices» y había que ponéis una tabla na cabeza pa que nun pudieran dir a buscar guerra coles collacies de pación. Había dalguna que daba pataes cuando se cataba, y había que peala. Tamién les había turriones y corriéronnos más d’una vez. Inda tengo la seña de la Cierva, que yera mui espantona y aplastóme un deu contra’l poste cuando la fui a prender na cuadra dempués de llendala. Mio ma fixo de médica. Entablillóme y encanóme’l deu hasta que curó.
Alredor de la casería siempre rondaben les bruxes y dalgún qu’otru bruxu, non precisamente de los que van enriba la escoba, sinón los que son quien a facer dañu cola mirada, como dicía mio güela. Les vaques podíen llegar a dar sangre en vez de lleche si dalgún-yos echaba’l mal del güeyu, o enllenase de pioyos. O quedase nos güesos, enllenes de llana y tol día col pelo repelón. La cuadra yera un llugar al que nun podíen entrar los sospechosos de causar estes malures. Pero si se colaben o si les embruxaben pel prau, pa ello tamién había rezares y ritos populares. Había qu’espaniales, con un pantalón vieyu que se-yos pasaba penriba’l llombu mientres se recitaba esti rezar: «Si tas embruxáu / desembrúxote you /quiebren los güeyos / de quien t’embruxóu. / Dos güeyos mundanos ya un corazón malu. / Dos güeyos t’agüeyaron / desuéyente tres: / S. Pedro y S. Pablo y el gloriosu San Andrés. / Todo’l mal ayenu. / Todo’l mal pesar / salga d’esta vaca / toda cuanta envidia nella hai». Llueu débanse-y palos al pantalón pa dempués quemalu. Y con él quemábase la bruxería.
Otres lleendes formaron siempre parte de la vida de la vaca. La culiebra acudía al golor de la lleche de vaca parida y mamaba hasta fartase, bien agarrada a los tetos, como si del xatu se tratara. Cuando’l xatín diba a mamar l’ubre yá taba vacíu y en pocos díes el xatu quedábase arruináu y nun olecía. Entós yera’l momentu de vixilar la culiebra pa cuando llegara a la cuadra, matala.
D’otra miente, hai la creencia de que, como otros animales, les vaques sienten la muerte. Cuando pela nueche encomenzaben a bramar, ensin motivu aparente, o se soltaben de la cadena y armaben gran xaréu coles esquiles hasta espertar a los amos, yera seña de que dalgo malo diba pasar ente la familia cercana. Toes estes lleendes van perdiendo puxu nes modernes instalaciones ganaderes. Nelles nun hai llugar pa toes estes falcatrúes.
« Entradas Anteriores
Comentarios (0)
