Prometer hasta meter

admin (15 de abril, 2012)

Rajoy y el so equipu de gobiernu, nada de lo que prometieron.

“Prometer hasta meter” . Un dichu que se pue aplicar a munches situaciones. Y nunca meyor qu’a la situación a la que nos ta llevando’l gobiernu de la nación. Nun fai falta tener muncha memoria p’alcordase de les promeses del señor Rajoy,” el desapaecíu”, cuando na campaña electoral s’enfotaba en prometer y prometer. Namás que ganó les eleiciones, de lo prometío nada de nada.
Rajoy prometió frenar el paru. El “frenu” ye que se calcula que nel presente añu xubirá polo menos 2,3 puntos hasta’l 24,3%. Total son namás 5.601.800 paraos, según datos facilitaos por esti periódicu en díes pasaos. Fixo’l milagru de xubir les pensiones ¡un 1%! El xuegu ta en que los xubilaos cobran menos, a costa de xubir los impuestos.Toles midíes tomaes hasta la fecha arremeten contra los trabayadores, contra los asalariaos y contra los más probes. Reforma llaboral sí, reforma de la fiscalidá non. ¡Cómo van tocar el patrimoniu de los ricos! Hai que dexalos que sigan cola fuxida de capital. Hai que siguir alimentando los paraísos fiscales.
“El desapaecíu” nun sabemos onde ta. Igual ta deprendiendo la lleición y faciendo los deberes en Alemania o en Francia . Y como práutiques de los sos “estudios” europeos, cada pocos díes prepáranos un nuevu tixeretazu, una nueva sorpresa. Pero ensin dar la cara.
Educación. El programa d’Escueles de 0-3 anunciánnoslu Montserrat Gomendio como acabáu. Fuera conciliación familiar. ¡Total, les muyeres tán mui bien en casa!
Fuera ordenadores personales pa los alumnos de Primaria. Aforru a la vista de 130 millones d’Euros. Aforrar n’educación. Cuanto más “burros” meyor, más fáciles de manexar. La rebaxa nes beques. Hai que sacar bones notes, “anque nun s’esixirá “excelencia”. ¡Cómo s’atreverán! Sicasí los alumnos pudientes, anque nun seyan brillantes, van poder siguir añu tres añu na Universidá porque tienen perres pa ello. Universidá subvencionada polos trabayadores, pero que será pa qu’estudien los ricos, como antaño.
Y tolo qu’aforramos en servicios. Aforrar pa qué. Quítanlo a los trabayadores pa da-yoslo a los especuladores de siempre, a los que nos llevaron a la situación de crisis actual. Pa la pequeña y mediana empresa nun hai perres; pa los bancos y pal gran capital, lo que pidan. Producir y xenerar emplegu ye lo menos importante, lo importante ye especular.
Y la última noticia ye la reforma en sanidá y educación. Echémonos a temblar. Agora van cargase dafechu l’estáu de bienestar que tanto nos contó consiguir. Vuelven a apaecer los de siempre, los insaciables, pa dar el gran bocáu, pa quitanos lo que ye nuestru y qu’esti gobiernu nun quier defender y nun paez sinón que ye parte interesada en desarmalo. Como s’acabó’l choyu del lladriyu agora van a polo que nos queda.
Too esto y muncho más. Acabamos d’entamar la cuesta del axuste. Asina tán les coses. Prometer hasta meter. Nun hai dichu más sabiu.

Categoría: General Comentarios Comentarios (1)

1 Respuesta a “Prometer hasta meter”

  1. margo Escribió:

    Nun sé a onde dirá a parar esto.La verdá ye que tien mala pinta.
    Dir al mélicu ca vez tá más complicao, tienes que esperar abondo pues siempre lleven retrasu.Esto de la sanidá va de mal en peor , quieren que morramos toos (los muertos nun paguen impuestos).
    Digo la sanidá ,como podría dicir coses de la escuela, del paro, etc,etc,etc…….
    Toi en total alcuerdu col to escritu, camiento que cualquier día hasta mos quiten de escribir con llibetrtá.

Escribir comentario